بستی کی لڑکیوں کے نام — آواز: ایم سعید | شاعر: اختر شیرانی

Basti ki Larkiyon ke Naam

Chal ay naseem-e-sehra, rooh-o-rawan-e-sehra
Mera payam le ja, soo-e-butaan-e-sehra
Sehrai mahwashon ki khidmat mein ja ke kehna
Bhoole nahin tumhein hum, ay dukhtaran-e-sehra
Gar bas chale to aayen aur dard-e-dil sunayen
Tum ko gale lagayen hum phir miyan-e-sehra
Tum Najd mein pareshan, shahron mein hum hain hairan
Allah ki amaan ho tum par, butaan-e-sehra
Tum is tarah ghamon se behaal ho rahi ho
Hum is taraf hain muztar, daaman kashaan-e-sehra
Hum paas aayen kyunkar, tum ko bulayen kyunkar
Yeh dukh mitayen kyunkar, waamandgaan-e-sehra
Betaab hain alam se, bekhwab ranj-o-gham se
Kya poochhti ho hum se, ay dilbaran-e-sehra
Tum yaad kar rahi ho, bedaad kar rahi ho
Barbaad kar rahi ho, ay gulrukhan-e-sehra
Yeh kya kaha ke tum ho ranginiyon ke khoogar
Ghamgeen hain tum se badh kar, ay ghamkashaan-e-sehra
Yeh raat, yeh ghatayen, yeh shor, yeh hawayen
Bichhde hue milenge kyunkar miyan-e-sehra
Shahron ki zindagi se hum tang aa chuke hain
Sehra mein phir bula lo, ay saakinaan-e-sehra
Yaad samoom ho ya sarsar ke tund tufaan
Darte nahin kisi se, dildadgan-e-sehra
Aabaadiyon mein haasil aazadiyan nahin hain
Aa jao tum hi ud kar, o taairan-e-sehra
Sehra ki wus'aton mein hum ko na bhool jaana
O dukhtaran-e-sehra, o aahuwaan-e-sehra
Ay abr chup na rehna, mera fasaana kehna
Mil jaye gar kahin woh, sarv-e-rawan-e-sehra
Dashti ki dhun mein saaqi, ik naghma-e-Iraqi
Haan phir suna ba-yaad-e-gul-chehrgaan-e-sehra
Aankhon mein bas raha hai naqsh-e-butaan-e-sehra
O dastaan sara chhed, ik dastaan-e-sehra
Mastana ja raha hai phir kaarwaan-e-sehra
Haan jhoom kar hadi khwaan, ik dastaan-e-sehra
Dehaat ki fazayen aankhon mein phir rahi hain
Dil mein sama rahi hai yaad-e-butaan-e-sehra
Nazron pe chha raha hai woh chandni ka manzar
Sehra mein khelti theen jab hooriyan-e-sehra
Woh chandni ka mausam, woh bekhudi ka aalam
Woh noor ka samandar, raig-e-rawan-e-sehra
Jalwe mah-e-jawan ke, woh rang kaarwaan ke
Woh naghme saarbaan ke, raqsaan miyan-e-sehra
Kyunkar na yaad aayen woh seem-goon fazayen
Woh aasman-e-sehra, mah-e-rawan-e-sehra
Woh kam-sinon ke gaane, woh khel, woh tarane
Befikri ke fasaney, vird-e-zaban-e-sehra
Khetton mein ghoomte the, har gul ko choomte the
Masti mein jhoomte the, jab maikashaan-e-sehra
Woh gaon, woh fazayen, woh fasl, woh hawayen
Woh khet, woh ghatayen, woh aasman-e-sehra
Phir yaad aa rahi hain, phir dil dukha rahi hain
Majnoon bana rahi hain Laila o shaan-e-sehra
Raaton ko chhup ke aana aur shaane ko hilana
Hai yaad woh jagana hum ko miyan-e-sehra
Woh un ki shokh aankhen, woh un ki saada nazren
Bekhud bana rahi hain dosheezgan-e-sehra
Woh ishq-pesha hoon main jis ke jawan naghme
Gaata hai chandni mein har naujawan-e-sehra
Ik badwiyat ka aashiq, sehraiyat se bekhud
Akhtar bhi apni dhun mein hai ik jawan-e-sehra