ویسے تو ہم سفر ہیں سبھی راستوں میں لوگ — آواز: نایاب | شاعر: محسن زیدی

ویسے تو ہم سفر ہیں سبھی راستوں میں لوگ

ویسے تو ہم سفر ہیں سبھی راستوں میں لوگ
لیکن بنٹے ہوئے ہیں کئی قافلوں میں لوگ
چہرہ اگرچہ اپنا نہیں دوسرے کا ہے
خوش پھر بھی عکس دیکھ کے ہیں آئنوں میں لوگ
اچھا ہے دور ابھی جو حقائق نظر سے ہیں
جی لیں گے تھوڑی دیر یوںہی آسروں میں لوگ
شب کو دیے جلانا بجھا دینا صبح کو
مصروف رات دن ہیں انہیں مشغلوں میں لوگ
سب جانتے ہیں کون ہے قاتل زمانے میں
لاتے ہیں ایسی بات کہیں تذکروں میں لوگ
یہ راہ حق یہ جادۂ عرفان و آگہی
مارے گئے ہیں جاں سے انہیں راستوں میں لوگ
محسنؔ یہ دشت جاں کا سفر سیر گل نہیں
چل تو پڑے ہیں گھر سے بڑے ولولوں میں لوگ

شاعر: محسن زیدی

آواز: نایاب