گئے موسم میں جو کھلتے تھے گلابوں کی طرح — آواز: زاہدحسین | شاعر: پروین شاکر
مقرر / سپیکر
گئے موسم میں جو کھلتے تھے گلابوں کی طرح
گئے موسم میں جو کھلتے تھے گلابوں کی طرح
دل پہ اتریں گے وہی خواب عذابوں کی طرح
راکھ کے ڈھیر پہ اب رات بسر کرنی ہے
جل چکے ہیں مرے خیمے مرے خوابوں کی طرح
ساعت دید کہ عارض ہیں گلابی اب تک
اولیں لمحوں کے گلنار حجابوں کی طرح
وہ سمندر ہے تو پھر روح کو شاداب کرے
تشنگی کیوں مجھے دیتا ہے سرابوں کی طرح
غیر ممکن ہے ترے گھر کے گلابوں کا شمار
میرے رستے ہوئے زخموں کے حسابوں کی طرح
یاد تو ہوں گی وہ باتیں تجھے اب بھی لیکن
شیلف میں رکھی ہوئی بند کتابوں کی طرح
کون جانے کہ نئے سال میں تو کس کو پڑھے
تیرا معیار بدلتا ہے نصابوں کی طرح
شوخ ہو جاتی ہے اب بھی تری آنکھوں کی چمک
گاہے گاہے ترے دلچسپ جوابوں کی طرح
ہجر کی شب مری تنہائی پہ دستک دے گی
تیری خوش بو مرے کھوئے ہوئے خوابوں کی طرح
شاعر: پروین شاکر
آواز: زاہدحسین
Gaye mausam mein jo khilte the gulabon ki tarah
Gaye mausam mein jo khilte the gulabon ki tarah
Dil pe utrenge wahi khwab azabon ki tarah
Raakh ke dheer pe ab raat basar karni hai
Jal chuke hain mere khaime mere khwabon ki tarah
Sa'at-e-deed ke aariz hain gulabi ab tak
Awwaleen lamhon ke gulnar hijabon ki tarah
Woh samundar hai toh phir rooh ko shadab kare
Tashnagi kyun mujhe deta hai sarabon ki tarah
Ghair mumkin hai tere ghar ke gulabon ka shumar
Mere raste hue zakhmon ke hisabon ki tarah
Yaad toh hongi woh baatein tujhe ab bhi lekin
Shelf mein rakhi hui band kitabon ki tarah
Kon jaane ke naye saal mein tu kis ko parhe
Tera mayar badalta hai nisabon ki tarah
Shokh ho jaati hai ab bhi teri aankhon ki chamak
Gahe gahe tere dilchasp jawabon ki tarah
Hijr ki shab meri tanhai pe dastak de gi
Teri khushboo mere khoye hue khwabon ki tarah