ایسا ہے کہ سب خواب مسلسل نہیں ہوتے — احمد فراز
شاعر
ایسا ہے کہ سب خواب مسلسل نہیں ہوتے
ایسا ہے کہ سب خواب مسلسل نہیں ہوتے
جو آج تو ہوتے ہیں مگر کل نہیں ہوتے
اندر کی فضاؤں کے کرشمے بھی عجب ہیں
مینہ ٹوٹ کے برسے بھی تو بادل نہیں ہوتے
کچھ مشکلیں ایسی ہیں کہ آساں نہیں ہوتیں
کچھ ایسے معمے ہیں کبھی حل نہیں ہوتے
شائستگیٔ غم کے سبب آنکھوں کے صحرا
نمناک تو ہو جاتے ہیں جل تھل نہیں ہوتے
کیسے ہی تلاطم ہوں مگر قلزم جاں میں
کچھ یاد جزیرے ہیں کہ اوجھل نہیں ہوتے
عشاق کے مانند کئی اہل ہوس بھی
پاگل تو نظر آتے ہیں پاگل نہیں ہوتے
سب خواہشیں پوری ہوں فرازؔ ایسا نہیں ہے
جیسے کئی اشعار مکمل نہیں ہوتے
Aisa hai ke sab khwab musalsal nahin hote
Aisa hai ke sab khwab musalsal nahin hote
Jo aaj to hote hain magar kal nahin hote
Andar ki fizaon ke karishme bhi ajab hi hain
Meenh toot ke barse bhi to baadal nahin hote
Kuch mushkilein aisi hain ke aasaan nahin hotin
Kuch aise mua'mme hain kabhi hal nahin hote
Shayistagi-e-gham ke sabab aankhon ke sehra
Namnaak to ho jaate hain jal thal nahin hote
Kaise hi talatum hon magar qulzum-e-jaan mein
Kuch yaad jazeere hain ke ojhal nahin hote
Ushaaq ke maanind kayi ahl-e-hawas bhi
Paagal to nazar aate hain paagal nahin hote
Sab khwahishein poori hon Faraz aisa nahin hai
Jaise kayi ash'aar mukammal nahin hote
شاعر کے بارے میں
ِاحمد فراز، اصل نام سید احمد شاہ، 12 جنوری 1931ء کو نوشہرہ میں پیدا ہوئے۔ ان کے والدسید محمد شاہ برق خود استاد اور فارسی شاعر تھے،احمد فراز ابتدائی...
مکمل تعارف پڑھیں