گفتگو اچھی لگی ذوق نظر اچھا لگا — احمد فراز
شاعر
گفتگو اچھی لگی ذوق نظر اچھا لگا
گفتگو اچھی لگی ذوق نظر اچھا لگا
مدتوں کے بعد کوئی ہم سفر اچھا لگا
دل کا دکھ جانا تو دل کا مسئلہ ہے پر ہمیں
اس کا ہنس دینا ہمارے حال پر اچھا لگا
ہر طرح کی بے سر و سامانیوں کے باوجود
آج وہ آیا تو مجھ کو اپنا گھر اچھا لگا
باغباں گلچیں کو چاہے جو کہے ہم کو تو پھول
شاخ سے بڑھ کر کف دل دار پر اچھا لگا
کوئی مقتل میں نہ پہنچا کون ظالم تھا جسے
تیغ قاتل سے زیادہ اپنا سر اچھا لگا
ہم بھی قائل ہیں وفا میں استواری کے مگر
کوئی پوچھے کون کس کو عمر بھر اچھا لگا
اپنی اپنی چاہتیں ہیں لوگ اب جو بھی کہیں
اک پری پیکر کو اک آشفتہ سر اچھا لگا
میرؔ کے مانند اکثر زیست کرتا تھا فرازؔ
تھا تو وہ دیوانہ سا شاعر مگر اچھا لگا
Guftagu achhi lagi zauq-e-nazar achha laga
Guftagu achhi lagi zauq-e-nazar achha laga
Muddaton ke baad koi humsafar achha laga
Dil ka dukh jaana to dil ka masla hai par humein
Us ka hans dena hamare haal par achha laga
Har tarah ki be-sar-o-samaniyon ke bawajood
Aaj woh aaya to mujh ko apna ghar achha laga
Baghban gulchin ko chahe jo kahe hum ko to phool
Shaakh se badh kar kaf-e-dildar par achha laga
Koi maqtal mein na pahuncha kaun zalim tha jise
Tegh-e-qatil se ziyada apna sar achha laga
Hum bhi qael hain wafa mein istiwaari ke magar
Koi pooche kaun kis ko umr bhar achha laga
Apni apni chahtein hain log ab jo bhi kahein
Ek pari paikar ko ek aashufta sar achha laga
Meer ke manind aksar zeest karta tha Faraz
Tha to woh deewana sa shair magar achha laga
شاعر کے بارے میں
ِاحمد فراز، اصل نام سید احمد شاہ، 12 جنوری 1931ء کو نوشہرہ میں پیدا ہوئے۔ ان کے والدسید محمد شاہ برق خود استاد اور فارسی شاعر تھے،احمد فراز ابتدائی...
مکمل تعارف پڑھیں