تیرے قریب آ کے بڑی الجھنوں میں ہوں — احمد فراز
شاعر
تیرے قریب آ کے بڑی الجھنوں میں ہوں
تیرے قریب آ کے بڑی الجھنوں میں ہوں
میں دشمنوں میں ہوں کہ ترے دوستوں میں ہوں
مجھ سے گریز پا ہے تو ہر راستہ بدل
میں سنگ راہ ہوں تو سبھی راستوں میں ہوں
تو آ چکا ہے سطح پہ کب سے خبر نہیں
بے درد میں ابھی انہیں گہرائیوں میں ہوں
اے یار خوش دیار تجھے کیا خبر کہ میں
کب سے اداسیوں کے گھنے جنگلوں میں ہوں
تو لوٹ کر بھی اہل تمنا کو خوش نہیں
یاں لٹ کے بھی وفا کے انہی قافلوں میں ہوں
بدلا نہ میرے بعد بھی موضوع گفتگو
میں جا چکا ہوں پھر بھی تری محفلوں میں ہوں
مجھ سے بچھڑ کے تو بھی تو روئے گا عمر بھر
یہ سوچ لے کہ میں بھی تری خواہشوں میں ہوں
تو ہنس رہا ہے مجھ پہ مرا حال دیکھ کر
اور پھر بھی میں شریک ترے قہقہوں میں ہوں
خود ہی مثال لالۂ صحرا لہو لہو
اور خود فرازؔ اپنے تماشائیوں میں ہوں
Tere qareeb aa ke badi uljhanon mein hoon
Tere qareeb aa ke badi uljhanon mein hoon
Main dushmanon mein hoon ke tere doston mein hoon
Mujh se gurez pa hai to har raasta badal
Main sang-e-raah hoon to sabhi raston mein hoon
Tu aa chuka hai satah pe kab se khabar nahin
Bedard main abhi unhin gehraiyon mein hoon
Aye yaar-e-khush-dayar tujhe kya khabar ke main
Kab se udasiyon ke ghane jangalon mein hoon
Tu laut kar bhi ahl-e-tamanna ko khush nahin
Yan lut ke bhi wafa ke unhin qafilon mein hoon
Badla na mere baad bhi mauzoo-e-guftugu
Main ja chuka hoon phir bhi teri mehfilon mein hoon
Mujh se bichhad ke tu bhi to royega umr bhar
Yeh soch le ke main bhi teri khwahishon mein hoon
Tu hans raha hai mujh pe mera haal dekh kar
Aur phir bhi main shareek tere qahqahon mein hoon
Khud hi misal-e-lala-e-sehra lahu lahu
Aur khud Faraz, apne tamashaiyon mein hoon
شاعر کے بارے میں
ِاحمد فراز، اصل نام سید احمد شاہ، 12 جنوری 1931ء کو نوشہرہ میں پیدا ہوئے۔ ان کے والدسید محمد شاہ برق خود استاد اور فارسی شاعر تھے،احمد فراز ابتدائی...
مکمل تعارف پڑھیں