اس نے سکوت شب میں بھی اپنا پیام رکھ دیا — احمد فراز
شاعر
اس نے سکوت شب میں بھی اپنا پیام رکھ دیا
اس نے سکوت شب میں بھی اپنا پیام رکھ دیا
ہجر کی رات بام پر ماہ تمام رکھ دیا
آمد دوست کی نوید کوئے وفا میں عام تھی
میں نے بھی اک چراغ سا دل سر شام رکھ دیا
شدت تشنگی میں بھی غیرت مے کشی رہی
اس نے جو پھیر لی نظر میں نے بھی جام رکھ دیا
اس نے نظر نظر میں ہی ایسے بھلے سخن کہے
میں نے تو اس کے پاؤں میں سارا کلام رکھ دیا
دیکھو یہ میرے خواب تھے دیکھو یہ میرے زخم ہیں
میں نے تو سب حساب جاں بر سر عام رکھ دیا
اب کے بہار نے بھی کیں ایسی شرارتیں کہ بس
کبک دری کی چال میں تیرا خرام رکھ دیا
جو بھی ملا اسی کا دل حلقہ بگوش یار تھا
اس نے تو سارے شہر کو کر کے غلام رکھ دیا
اور فرازؔ چاہئیں کتنی محبتیں تجھے
ماؤں نے تیرے نام پر بچوں کا نام رکھ دیا
Us ne sukoot-e-shab mein bhi apna payam rakh diya
Us ne sukoot-e-shab mein bhi apna payam rakh diya
Hijr ki raat baam par maah-e-tamaam rakh diya
Aamad-e-dost ki naveed ku-e-wafa mein aam thi
Main ne bhi ek chiragh sa dil sar-e-sham rakh diya
Shiddat-e-tishnagi mein bhi ghairat-e-mai-kashi rahi
Us ne jo pher li nazar main ne bhi jaam rakh diya
Us ne nazar nazar mein hi aise bhale sukhan kahe
Main ne to us ke paon mein sara kalam rakh diya
Dekho ye mere khwab the dekho ye mere zakhm hain
Main ne to sab hisab-e-jaan bar sar-e-aam rakh diya
Ab ke bahar ne bhi keen aisi shararatein ke bas
Kabak-e-dari ki chaal mein tera khiram rakh diya
Jo bhi mila isi ka dil halqa-bagoosh-e-yar tha
Us ne to saare shahr ko kar ke ghulam rakh diya
Aur Farazؔ chahiyen kitni mohabbatein tujhe
Maon ne tere naam par bachchon ka naam rakh diya
شاعر کے بارے میں
ِاحمد فراز، اصل نام سید احمد شاہ، 12 جنوری 1931ء کو نوشہرہ میں پیدا ہوئے۔ ان کے والدسید محمد شاہ برق خود استاد اور فارسی شاعر تھے،احمد فراز ابتدائی...
مکمل تعارف پڑھیں