کس لیے چپ ہوں وضاحت بھی نہیں کر سکتا — اشرف یوسفی
شاعر
کس لیے چپ ہوں وضاحت بھی نہیں کر سکتا
کس لیے چپ ہوں وضاحت بھی نہیں کر سکتا
میں محبت میں شکایت بھی نہیں کر سکتا
ایک اک کر کے پرندوں نے تو ہجرت کر لی
پیڑ ہوں پیڑ تو ہجرت بھی نہیں کر سکتا
کیا مجھے سانس بھی لینے کی اجازت نہیں ہے
کیا میں اک اور محبت بھی نہیں کر سکتا
کیا زمانہ ہے کہ اس عہد زیاں میں کوئی شخص
اپنے بچوں کو نصیحت بھی نہیں کر سکتا
کون سا خوف رگ و پے میں سمایا ہے کہ اب
میں برائی کی مذمت بھی نہیں کر سکتا
اب کسی اشک کو کیا آنکھ میں رکھا جائے
اشک جو غم کی حفاظت بھی نہیں کر سکتا
سامنا ہو تو زباں دل کا نہیں دیتی ساتھ
کچھ بتانے کی میں ہمت بھی نہیں کر سکتا
سانحہ یہ ہے اسے مجھ سے جدا ہونا ہے
اور ستم یہ کہ میں رخصت بھی نہیں کر سکتا
Kis liye chup hoon wazahat bhi nahi kar sakta
Kis liye chup hoon wazahat bhi nahi kar sakta
Main mohabbat mein shikayat bhi nahi kar sakta
Ek ek kar ke parindoN ne to hijrat kar li
Ped hoon ped to hijrat bhi nahi kar sakta
Kya mujhe saans bhi lene ki ijazat nahi hai
Kya main ik aur mohabbat bhi nahi kar sakta
Kya zamana hai ke iss ahd-e-ziyaN mein koi shakhs
Apne bachchon ko naseehat bhi nahi kar sakta
Kaun sa khauf ragh-o-pe mein samaya hai ke ab
Main burai ki mazammat bhi nahi kar sakta
Ab kisi ashk ko kya aankh mein rakha jaye
Ashk jo gham ki hifazat bhi nahi kar sakta
Saamna ho to zabaan dil ka nahi deti saath
Kuch batane ki main himmat bhi nahi kar sakta
Saniha yeh hai usay mujh se juda hona hai
Aur sitam yeh ke main rukhsat bhi nahi kar sakta