آئے کچھ ابر کچھ شراب آئے — فیض احمد فیض
شاعر
آئے کچھ ابر کچھ شراب آئے
آئے کچھ ابر کچھ شراب آئے
اس کے بعد آئے جو عذاب آئے
بام مینا سے ماہتاب اترے
دست ساقی میں آفتاب آئے
ہر رگ خوں میں پھر چراغاں ہو
سامنے پھر وہ بے نقاب آئے
عمر کے ہر ورق پہ دل کی نظر
تیری مہر و وفا کے باب آئے
کر رہا تھا غم جہاں کا حساب
آج تم یاد بے حساب آئے
نہ گئی تیرے غم کی سرداری
دل میں یوں روز انقلاب آئے
جل اٹھے بزم غیر کے در و بام
جب بھی ہم خانماں خراب آئے
اس طرح اپنی خامشی گونجی
گویا ہر سمت سے جواب آئے
فیضؔ تھی راہ سر بسر منزل
ہم جہاں پہنچے کامیاب آئے
Aaye kuch abr kuch sharab aaye
Aaye kuch abr kuch sharab aaye
Us ke baad aaye jo azab aaye
Baam-e-meena se mahtab utre
Dast-e-saqi mein aftab aaye
Har rag-e-khoon mein phir chiraghan ho
Samne phir woh be-naqab aaye
Umr ke har varaq pe dil ki nazar
Teri mehr-o-wafa ke baab aaye
Kar raha tha gham-e-jahan ka hisab
Aaj tum yaad be-hisab aaye
Na gayi tere gham ki sardari
Dil mein yun roz-e-inqilab aaye
Jal uthe bazm-e-ghair ke dar-o-baam
Jab bhi hum khanuman-kharab aaye
Is tarah apni khamoshi goonji
Goya har simt se jawab aaye
Faiz thi raah sar-basar manzil
Hum jahan pahunche kamyab aaye