اب وہی حرف جنوں سب کی زباں ٹھہری ہے — فیض احمد فیض
شاعر
اب وہی حرف جنوں سب کی زباں ٹھہری ہے
اب وہی حرف جنوں سب کی زباں ٹھہری ہے
جو بھی چل نکلی ہے وہ بات کہاں ٹھہری ہے
آج تک شیخ کے اکرام میں جو شے تھی حرام
اب وہی دشمن دیں راحت جاں ٹھہری ہے
ہے خبر گرم کہ پھرتا ہے گریزاں ناصح
گفتگو آج سر کوئے بتاں ٹھہری ہے
ہے وہی عارض لیلیٰ وہی شیریں کا دہن
نگہ شوق گھڑی بھر کو جہاں ٹھہری ہے
وصل کی شب تھی تو کس درجہ سبک گزری تھی
ہجر کی شب ہے تو کیا سخت گراں ٹھہری ہے
بکھری اک بار تو ہاتھ آئی ہے کب موج شمیم
دل سے نکلی ہے تو کب لب پہ فغاں ٹھہری ہے
دست صیاد بھی عاجز ہے کف گلچیں بھی
بوئے گل ٹھہری نہ بلبل کی زباں ٹھہری ہے
آتے آتے یوں ہی دم بھر کو رکی ہوگی بہار
جاتے جاتے یوں ہی پل بھر کو خزاں ٹھہری ہے
ہم نے جو طرز فغاں کی ہے قفس میں ایجاد
فیضؔ گلشن میں وہی طرز بیاں ٹھہری ہے
Ab wahi harf-e-junoon sab ki zaban thehri hai
Ab wahi harf-e-junoon sab ki zaban thehri hai
Jo bhi chal nikli hai woh baat kahan thehri hai
Aaj tak shaikh ke ikram mein jo shai thi haram
Ab wahi dushman-e-deen rahat-e-jaan thehri hai
Hai khabar garm ke phirta hai gurezan nasih
Guftagu aaj sar-e-kuye-butan thehri hai
Hai wahi ariz-e-Laila wahi Shireen ka dahan
Nigah-e-shauq ghadi bhar ko jahan thehri hai
Vasl ki shab thi to kis darja sabuk guzri thi
Hijr ki shab hai to kya sakht garan thehri hai
Bikhri ek baar to hath aayi hai kab mauj-e-shamim
Dil se nikli hai to kab lab pe fughan thehri hai
Dast-e-sayyad bhi ajiz hai kaf-e-gulcheen bhi
Boo-e-gul thehri na bulbul ki zaban thehri hai
Aate aate yun hi dam bhar ko ruki hogi bahar
Jaate jaate yun hi pal bhar ko khizan thehri hai
Hum ne jo tarz-e-fughan ki hai qafas mein ijaad
Faiz gulshan mein wahi tarz-e-bayan thehri hai