اوس پڑی تھی رات بہت اور کہرہ تھا گرمائش پر — گلزار
شاعر
اوس پڑی تھی رات بہت اور کہرہ تھا گرمائش پر
اوس پڑی تھی رات بہت اور کہرہ تھا گرمائش پر
سیلی سی خاموشی میں آواز سنی فرمائش پر
فاصلے ہیں بھی اور نہیں بھی ناپا تولا کچھ بھی نہیں
لوگ بضد رہتے ہیں پھر بھی رشتوں کی پیمائش پر
منہ موڑا اور دیکھا کتنی دور کھڑے تھے ہم دونوں
آپ لڑے تھے ہم سے بس اک کروٹ کی گنجائش پر
کاغذ کا اک چاند لگا کر رات اندھیری کھڑکی پر
دل میں کتنے خوش تھے اپنی فرقت کی آرائش پر
دل کا حجرہ کتنی بار اجڑا بھی اور بسایا بھی
ساری عمر کہاں ٹھہرا ہے کوئی ایک رہائش پر
دھوپ اور چھاؤں بانٹ کے تم نے آنگن میں دیوار چنی
کیا اتنا آسان ہے زندہ رہنا اس آسائش پر
شاید تین نجومی میری موت پہ آ کر پہنچیں گے
ایسا ہی اک بار ہوا تھا عیسیٰ کی پیدائش پر
Oas paRi thi raat bahut aur kohra tha garmaish par
Oas paRi thi raat bahut aur kohra tha garmaish par
Seeli si khamoshi mein aavaz suni farmaish par
Faasle hain bhi aur nahin bhi napa tola kuchh bhi nahin
Log bazid rehte hain phir bhi rishton ki paimaish par
Munh moRa aur dekha kitni door khaRe the hum donon
Aap laRe the hum se bas ek karvaT ki gunjaish par
Kaghaz ka ek chand laga kar raat andheri khaRki par
Dil mein kitne khush the apni furqat ki aaraish par
Dil ka hujra kitni baar ujaRa bhi aur basaya bhi
Saari umar kahan Thahra hai koi ek rehaish par
Dhoop aur chhaon baant ke tum ne aangan mein deewar chuni
Kya itna aasaan hai zinda rehna is aasaish par
Shayad teen najoomi meri maut pe aa kar pahunchenge
Aisa hi ek baar hua tha Isa ki paidaish par