تخیّل اور ہے، نادیدہ بینی اور ہوتی ہے — عرفان ستار
شاعر
تخیّل اور ہے، نادیدہ بینی اور ہوتی ہے
تخیّل اور ہے، نادیدہ بینی اور ہوتی ہے
یہ تنہائی ہے بس، خلوت نشینی اور ہوتی ہے
عجب دھڑکا لگا رہتا ہے دل کو اُس کی فرقت میں
مگر وہ پاس ہو تو بے یقینی اور ہوتی ہے
سیہ چشمی حسینوں کی تو ویسے بھی قیامت ہے
مگر پاس ِ حیا کی سرمگینی اور ہوتی ہے
گریز اُس کا بجائے خود ادائے خاص ہے لیکن
خمار ِ وصل کی نازآفرینی اور ہوتی ہے
نہیں مشروط کار ِ عاشقاں ترک ِ سکونت سے
میاں، اہل ِ جنوں کی نامکینی اور ہوتی ہے
ہمیں ویسے تو یہ اہل ِ جہاں کیا کچھ نہیں کہتے
مگر احباب ِ دل کی نکتہ چینی اور ہوتی ہے
Takhayyul aur hai, nadīda beeni aur hoti hai
Takhayyul aur hai, nadīda beeni aur hoti hai
Yeh tanhai hai bas, khalwat nasheeni aur hoti hai
Ajab dhaṛka laga rehta hai dil ko us ki furqat mein
Magar woh paas ho to be-yaqeeni aur hoti hai
Siyah chashmi haseenon ki to waise bhi qayamat hai
Magar paas-e-haya ki surmagīni aur hoti hai
Gureez us ka bajaaye khud adaaye khas hai lekin
Khumār-e-wasl ki nāz-āfrīni aur hoti hai
Nahin mashroot kaar-e-āshiqān tark-e-sukoonat se
Miyan, ahl-e-junoon ki nāmakīni aur hoti hai
Hamein waise to yeh ahl-e-jahān kya kuchh nahin kehte
Magar ahbāb-e-dil ki nukta-cheeni aur hoti hai
شاعر کے بارے میں
نام عرفان ستار اور تخلص عرفان ہے۔فروری۱۹۶۸ء میں کراچی میں پیدا ہوئے ۔ ابتدائی تعلیم لیبیا میں حاصل کی۔ کراچی آکر ایم بی اے اور ایم ایس کیا۔
مکمل تعارف پڑھیں