اندیشے — کیفی اعظمی

Andeshe

Rooh bechain hai ek dil ki aziyat kya hai
Dil hi shola hai to yeh soz-e-mohabbat kya hai
Woh mujhe bhool gai is ki shikayat kya hai
Ranj to yeh hai ke ro ro ke bhulaya hoga
Woh kahan aur kahan kahish-e-gham, sozish-e-jaan
Us ki rangeen nazar aur nuqoosh-e-hirmaan
Us ka ehsaas-e-lateef aur shikast-e-armaan
Ta'ana zan ek zamana nazar aaya hoga
Jhuk gai hogi jawaan saal umangon ki jabeen
Mit gai hogi lalak, doob gaya hoga yaqeen
Chha gaya hoga dhuaan, ghoom gai hogi zameen
Apne pehle hi gharounde ko jo dhaaya hoga
Dil ne aise bhi kuch afsane sunaye honge
Ashk aankhon ne piye aur na bahaye honge
Band kamre mein jo khat mere jalaye honge
Ek ek harf jabeen par ubhar aaya hoga
Us ne ghabra ke nazar laakh bachayi hogi
Mit ke ek naqsh ne sau shakal dikhayi hogi
Mez se jab meri tasweer hataayi hogi
Har taraf mujh ko tadapta hua paya hoga
Be-mahal chhed pe jazbaat ubal aaye honge
Gham pashemaan tabassum mein dhal aaye honge
Naam par mere jab aansoo nikal aaye honge
Sar na kandhe se saheli ke uthaya hoga
Zulf zid kar ke kisi ne jo hataayi hogi
Roothe jalwon pe khazaan aur bhi chhaayi hogi
Barq-e-ishwon ne kayi din na giraayi hogi
Rang chehre pe kayi roz na aaya hoga