اگرچہ میں اک چٹان سا آدمی رہا ہوں — محسن نقوی
شاعر
اگرچہ میں اک چٹان سا آدمی رہا ہوں
اگرچہ میں اک چٹان سا آدمی رہا ہوں
مگر ترے بعد حوصلہ ہے کہ جی رہا ہوں
وہ ریزہ ریزہ مرے بدن میں اتر رہا ہے
میں قطرہ قطرہ اسی کی آنکھوں کو پی رہا ہوں
تری ہتھیلی پہ کس نے لکھا ہے قتل میرا
مجھے تو لگتا ہے میں ترا دوست بھی رہا ہوں
کھلی ہیں آنکھیں مگر بدن ہے تمام پتھر
کوئی بتائے میں مر چکا ہوں کہ جی رہا ہوں
کہاں ملے گی مثال میری ستم گری کی
کہ میں گلابوں کے زخم کانٹوں سے سی رہا ہوں
نہ پوچھ مجھ سے کہ شہر والوں کا حال کیا تھا
کہ میں تو خود اپنے گھر میں بھی دو گھڑی رہا ہوں
ملا تو بیتے دنوں کا سچ اس کی آنکھ میں تھا
وہ آشنا جس سے مدتوں اجنبی رہا ہوں
بھلا دے مجھ کو کہ بے وفائی بجا ہے لیکن
گنوا نہ مجھ کو کہ میں تری زندگی رہا ہوں
وہ اجنبی بن کے اب ملے بھی تو کیا ہے محسنؔ
یہ ناز کم ہے کہ میں بھی اس کا کبھی رہا ہوں
Agarche main ek chatan sa aadmi raha hoon
Agarche main ek chatan sa aadmi raha hoon
Magar tere baad hausla hai ki ji raha hoon
Woh reza reza mere badan mein utar raha hai
Main qatra qatra usi ki aankhon ko pi raha hoon
Teri hatheli pe kis ne likha hai qatl mera
Mujhe to lagta hai main tera dost bhi raha hoon
Khuli hain aankhein magar badan hai tamam patthar
Koi bataye main mar chuka hoon ki ji raha hoon
Kahan milegi misaal meri sitamgari ki
Ki main gulabon ke zakhm kaanton se si raha hoon
Na poochh mujh se ki shahr walon ka haal kya tha
Ki main to khud apne ghar mein bhi do ghadi raha hoon
Mila to beete dinon ka sach us ki aankh mein tha
Woh aashna jis se muddaton ajnabi raha hoon
Bhula de mujh ko ki be-wafai baja hai lekin
Ganwa na mujh ko ki main teri zindagi raha hoon
Woh ajnabi ban ke ab mile bhi to kya hai Mohsin
Yeh naaz kam hai ki main bhi us ka kabhi raha hoon
شاعر کے بارے میں
سید محسن نقوی (اصل نام: سید غلام عباس نقوی) اردو کے ان ممتاز اور اثر انگیز شعرا میں شمار ہوتے ہیں جنہوں نے مختصر عمر میں گہرا اور دیرپا ادبی نقش چھ...
مکمل تعارف پڑھیں