یہ کہہ گئے ہیں مسافر لٹے گھروں والے — محسن نقوی
شاعر
یہ کہہ گئے ہیں مسافر لٹے گھروں والے
یہ کہہ گئے ہیں مسافر لٹے گھروں والے
ڈریں ہوا سے پرندے کھلے پروں والے
یہ میرے دل کی ہوس دشت بے کراں جیسی
وہ تیری آنکھ کے تیور سمندروں والے
ہوا کے ہاتھ میں کاسے ہیں زرد پتوں کے
کہاں گئے وہ سخی سبز چادروں والے
کہاں ملیں گے وہ اگلے دنوں کے شہزادے
پہن کے تن پہ لبادے گداگروں والے
پہاڑیوں میں گھرے یہ بجھے بجھے رستے
کبھی ادھر سے گزرتے تھے لشکروں والے
انہی پہ ہو کبھی نازل عذاب آگ اجل
وہی نگر کبھی ٹھہریں پیمبروں والے
ترے سپرد کروں آئینے مقدر کے
ادھر تو آ مرے خوش رنگ پتھروں والے
کسی کو دیکھ کے چپ چپ سے کیوں ہوئے محسنؔ
کہاں گئے وہ ارادے سخن وروں والے
Ye keh gaye hain musaafir luṭe gharon waale
Ye keh gaye hain musaafir luṭe gharon waale
Ḍaren hawa se parinde khule paron waale
Ye mere dil ki hawis dasht be-karaan jaisi
Wo teri aankh ke tewar samundaron waale
Hawa ke haath mein kaase hain zard patton ke
Kahan gaye wo sakhi sabz chaadaron waale
Kahan milenge wo agle dinon ke shehzade
Pehan ke tan pe libaade gadagaron waale
Pahaaṛiyon mein ghure ye bujhe bujhe raste
Kabhi idhar se guzarte the lashkaron waale
Inhi pe ho kabhi nazil azaab aag ajal
Wahi nagar kabhi ṭhahrain payambaron waale
Tere supurd karun aaine muqaddar ke
Idhar to aa mere khush-rang pattharon waale
Kisi ko dekh ke chup chup se kyun hue Mohsinؔ
Kahan gaye wo iraade sukhanwaron waale
شاعر کے بارے میں
سید محسن نقوی (اصل نام: سید غلام عباس نقوی) اردو کے ان ممتاز اور اثر انگیز شعرا میں شمار ہوتے ہیں جنہوں نے مختصر عمر میں گہرا اور دیرپا ادبی نقش چھ...
مکمل تعارف پڑھیں