دور تک سبزہ کہیں ہے اور نہ کوئی سائباں — محسن زیدی
شاعر
دور تک سبزہ کہیں ہے اور نہ کوئی سائباں
دور تک سبزہ کہیں ہے اور نہ کوئی سائباں
زیر پا تپتی زمیں ہے سر پہ جلتا آسماں
جیسے دو ملکوں کو اک سرحد الگ کرتی ہوئی
وقت نے خط ایسا کھینچا میرے اس کے درمیاں
اب کے سیلاب بلا سب کچھ بہا کر لے گیا
اب نہ خوابوں کے جزیرے ہیں نہ دل کی کشتیاں
لطف ان کا اب ہوا تو ہے مگر کچھ اس طرح
جیسے صحرا سے گزر جائے کوئی ابر رواں
منحصر ہے ایسی اک بنیاد پر اس کا یقیں
جس طرح دوش ہوا پر کوئی تنکوں کا مکاں
بے زبانوں سے خموشی کا گلہ کیسا کہ جب
سو گئے لفظوں کی چادر تان کر اہل زباں
یہ سفر کیسا ہے محسنؔ جتنا بڑھتے جائیے
بڑھتی جائیں اتنی ہی منزل بہ منزل دوریاں
Door tak sabza kahin hai aur na koi saayeban
Door tak sabza kahin hai aur na koi saayeban
Zer-e-pa tapti zameen hai sar pe jalta aasmaan
Jaise do mulkon ko ik sarhad alag karti hui
Waqt ne khat aisa kheenchha mere us ke darmiyan
Ab ke sailaab-e-bala sab kuchh baha kar le gaya
Ab na khwabon ke jazire hain na dil ki kashtiyan
Lutf un ka ab hua to hai magar kuchh is tarah
Jaise sahra se guzar jaaye koi abr-e-rawaan
Munhasir hai aisi ek buniyad par us ka yaqeen
Jis tarah dosh-e-hawa par koi tinkon ka makaan
Be-zabanon se khamoshi ka gila kaisa ke jab
So gaye lafzon ki chadar taan kar ahl-e-zaban
Ye safar kaisa hai Mohsin jitna badhte jaaiye
Badhti jaayen itni hi manzil ba manzil dooriyan
شاعر کے بارے میں
محسن زیدی، پورا نام سید محسن رضا زیدی اور قلمی نام محسن، اردو غزل کے ایک معتبر اور باوقار شاعر تھے۔ ان کی پیدائش 10 جولائی 1935ء کو بہرائچ، اتر پرد...
مکمل تعارف پڑھیں