رہنے دو اک دو گھڑی دیوار و در کے سامنے — محسن زیدی
شاعر
رہنے دو اک دو گھڑی دیوار و در کے سامنے
رہنے دو اک دو گھڑی دیوار و در کے سامنے
ایک مدت بعد آیا ہوں میں گھر کے سامنے
تم کو دعویٰ ہے کہ تم پتھر ہو میں کہتا ہوں موم
فیصلہ ہو جائے گا آؤ شرر کے سامنے
ایک قاتل جو مشابہ میری ہی صورت سے تھا
قتل مجھ کو کر گیا میری نظر کے سامنے
اب سر منظر سمندر ہے لہو کا اور میں
ہٹ گیا کوئی عقب میں مجھ کو کر کے سامنے
آسماں سطح زمیں سے اب نظر آتا نہیں
سر سے بھی اونچی ہے اک دیوار سر کے سامنے
پی رہا ہوں شام سے اپنی شکستوں کا لہو
یاس رکھتی جا رہی ہے جام بھر کے سامنے
میں نے دیکھا آئنے کو عکس میں چھپتے ہوئے
یہ تماشا بھی ہوا میری نظر کے سامنے
نقطۂ آغاز پر ہر بار لوٹ آتا ہوں میں
راستہ ہی ختم ہے ہر رہ گزر کے سامنے
بہہ گئے محسنؔ تن آور پیڑ بھی سیلاب میں
چند تنکوں کی حقیقت کیا شجر کے سامنے
Rehne Do Ik Do Ghadi Deewar O Dar Ke Saamne
Rehne do ik do ghadi deewar o dar ke saamne
Ek muddat baad aaya hoon main ghar ke saamne
Tum ko da'awa hai ke tum patthar ho main kehta hoon mom
Faisla ho jaayega aao sharar ke saamne
Ek qaatil jo mushaabeh meri hi soorat se tha
Qatl mujh ko kar gaya meri nazar ke saamne
Ab sar manzar samundar hai lahu ka aur main
Hat gaya koi aqab mein mujh ko kar ke saamne
Aasmaan satah e zameen se ab nazar aata nahin
Sar se bhi oonchi hai ik deewar sar ke saamne
Pee raha hoon shaam se apni shikaston ka lahu
Yaas rakhti ja rahi hai jaam bhar ke saamne
Maine dekha aaine ko akss mein chhupte hue
Yeh tamaasha bhi hua meri nazar ke saamne
Nuqta e aaghaaz par har baar laut aata hoon main
Raasta hi khatam hai har reh guzar ke saamne
Beh gaye Mohsinؔ tan aawar ped bhi sailaab mein
Chand tinkon ki haqeeqat kya shajar ke saamne
شاعر کے بارے میں
محسن زیدی، پورا نام سید محسن رضا زیدی اور قلمی نام محسن، اردو غزل کے ایک معتبر اور باوقار شاعر تھے۔ ان کی پیدائش 10 جولائی 1935ء کو بہرائچ، اتر پرد...
مکمل تعارف پڑھیں