ہم رنگ لاغری سے ہوں گل کی شمیم کا — مومن خان مومن
شاعر
ہم رنگ لاغری سے ہوں گل کی شمیم کا
ہم رنگ لاغری سے ہوں گل کی شمیم کا
طوفان باد ہے مجھے جھونکا نسیم کا
چھوڑا نہ کچھ بھی سینے میں طغیان اشک نے
اپنی ہی فوج ہو گئی لشکر غنیم کا
یاران نو کے واسطے مجھ سے خفا ہوئے
تم کو نہیں ہے پاس نیاز قدیم کا
یاد آئی کافروں کو مری آہ سرد کی
کیونکہ نہ کانپنے لگے شعلہ جحیم کا
از بس کہ ثبت نامہ ہے سوز تپ دروں
قاصد کا ہاتھ ہے ید بیضا کلیم کا
واعظ کبھی ہلا نہیں کوئے صنم سے میں
کیا جانوں کیا ہے مرتبہ عرش عظیم کا
مارا ہے وصل غیر کے شکوے پہ چاہیئے
مدفن جدا جدا مری لاش دو نیم کا
کہتا ہے بات بات پہ کیوں جان کھا گئے
گویا کہ پک گیا ہے کلیجہ ندیم کا
واعظ بتوں کو خلد میں لے جائیں گے کہیں
ہے وعدہ کافروں سے عذاب الیم کا
مومنؔ تجھے تو وہب ہے مومن ہی وہ نہیں
جو معتقد نہیں تری طبع سلیم کا
hum rang-e-laghari se hon gul ki shamim ka
hum rang-e-laghari se hon gul ki shamim ka
tufan-e-baad hai mujhe jhonka nasim ka
chhora na kuchh bhi seene mein tughyan-e-ashk ne
apni hi fauj ho gayi lashkar-e-ghanim ka
yaran-e-nau ke waste mujh se khafa hue
tum ko nahin hai paas-e-niyaz-e-qadim ka
yaad aayi kafiron ko meri aah-e-sard ki
kyunke na kaanpne lage shola-e-jahim ka
az bas ki sabt nama hai soz-e-tap-e-darun
qasid ka hath hai yad-e-baiza-e-kalim ka
wa'iz kabhi hila nahin ku-e-sanam se main
kya jaanun kya hai martaba arsh-e-azim ka
mara hai vasl-e-ghair ke shikve pe chahiye
madfan juda juda meri lash do neem ka
kahta hai baat baat pe kyun jaan kha gaye
goya ki pak gaya hai kaleja nadim ka
wa'iz buton ko khuld mein le jayenge kahin
hai va'da kafiron se azab-e-alim ka
Momin! tujhe to wahab hai Momin hi wo nahin
jo mu'taqid nahin teri tab-e-salim ka
شاعر کے بارے میں
مومن خان مومن اردو کے کلاسیکی عہد کے اُن ممتاز شعرا میں شمار ہوتے ہیں جنہوں نے غزل کو نیا ذوق، نئی لطافت اور گہری جذباتی معنویت عطا کی۔ ان کا اصل ن...
مکمل تعارف پڑھیں