جوں نکہت گل جنبش ہے جی کا نکل جانا — مومن خان مومن
شاعر
جوں نکہت گل جنبش ہے جی کا نکل جانا
جوں نکہت گل جنبش ہے جی کا نکل جانا
اے باد صبا میری کروٹ تو بدل جانا
پالغز محبت سے مشکل ہے سنبھل جانا
اس رخ کی صفائی پر اس دل کا پھسل جانا
سینہ میں جو دل تڑپا دھر ہی تو دیا دیکھا
پھر بھول گیا کیسا میں ہاتھ کا پھل جانا
اتنا تو نہ گھبراؤ راحت یہیں فرماؤ
گھر میں مرے رہ جاؤ آج اور بھی کل جانا
اے دل وہ جو یاں آیا کیا کیا ہمیں ترسایا
تو نے کہیں سکھلایا قابو سے نکل جانا
کیا ایسے سے دعویٰ ہو محشر میں کہ میں نے تو
نظارۂ قاتل کو احسان اجل جانا
ہے ظلم کرم جتنا تھا فرق پڑا کتنا
مشکل ہے مزاج اتنا اک بار بدل جانا
حوروں کی ثنا خوانی واعظ یوں ہی کب مانی
لے آ کہ ہے نادانی باتوں میں بہل جانا
عشق ان کی بلا جانے عاشق ہوں تو پہچانے
لو مجھ کو اطبا نے سودے کا خلل جانا
کیا باتیں بناتا ہے وہ جان جلاتا ہے
پانی میں دکھاتا ہے کافور کا جل جانا
مطلب ہے کہ وصلت میں ہے بوالہوس آفت میں
اس گرمی صحبت میں اے دل نہ پگھل جانا
دم لینے کی طاقت ہے بیمار محبت ہے
اتنا بھی غنیمت ہے مومنؔ کا سنبھل جانا
jun nikhat-e-gul junbish hai ji ka nikal jana
jun nikhat-e-gul junbish hai ji ka nikal jana
ae baad-e-saba meri karwat to badal jana
palghaz-e-mohabbat se mushkil hai sambhal jana
is rukh ki safayi par is dil ka phisal jana
seene mein jo dil tadpa dhar hi to diya dekha
phir bhool gaya kaisa main haath ka phal jana
itna to na ghabrao rahat yahin farmao
ghar mein mere rah jao aaj aur bhi kal jana
ae dil wo jo yahan aaya kya kya hamein tarsaya
tu ne kahin sikhlaaya qabu se nikal jana
kya aise se dava ho mahshar mein ki main ne to
nazara-e-qatil ko ehsan-e-ajal jana
hai zulm-o-karam jitna tha farq pada kitna
mushkil hai mizaj itna ek bar badal jana
hooron ki sana-khwani wa'iz yunhi kab maani
le aa ki hai nadani baaton mein behal jana
ishq un ki bala jaane aashiq hon to pahchane
lo mujh ko atibba ne saude ka khalal jana
kya baatein banata hai wo jaan jalata hai
pani mein dikhata hai kafoor ka jal jana
matlab hai ki vaslat mein hai bawl-hawas aafat mein
is garmi-e-sohbat mein ae dil na pighal jana
dam lene ki taqat hai beemar-e-mohabbat hai
itna bhi ghaneemat hai Momin! ka sambhal jana
شاعر کے بارے میں
مومن خان مومن اردو کے کلاسیکی عہد کے اُن ممتاز شعرا میں شمار ہوتے ہیں جنہوں نے غزل کو نیا ذوق، نئی لطافت اور گہری جذباتی معنویت عطا کی۔ ان کا اصل ن...
مکمل تعارف پڑھیں