جب درد پرانے ہو بیٹھے — نا معلوم

Jab dard puraane ho baithe

Jab dard puraane ho baithe
Jab yaad ka jugnu raakh hua
Jab aankh mein aansu barf hue
Jab zakhm se dil maanus hua
Tab mujh pe khula main zinda hoon
Phir dil ko dhaṛakna yaad aaya !
Jab karb ki lambi raahon mein
Ehsaas ke baal safed hue
Jab aankhein be-sailaab hueen
Jab chaand chaṛha be-dardi ka
Jab ret pe likhi yaadon ko
Be-mehr hawa ne chheen liya
Jab 'yaad ratein' be-daad hueen
Tab mujh pe khula main zinda hoon
Phir dil ko dhaṛakna yaad aaya
Jab aankhein kuch aabaad hueen
Jab mujh pe khula main zinda hoon
Ehsaas ka bachpan jaag paṛa
Phir jazbe be-taqveem hue!
Phir waqt ne kuch angṛaai li
Phir soch ki qabr se dhool uṛi
Phir pyaas ka barzakh bhool gaya
Ek hijr se kya azaad hue?
Sau hijr naye ijaad hue!
Phir ashk mein darya qaid hua
Phir dhaṛkan mein bhoonchaal paṛe
Phir ishq ka jogi galiyon mein
Taqdeer ke saanp uṭha laaya
Phir hosh ka jangal sabz hua
Phir shauq-e-dareena jaag uṭha
Phir zulf ke tewar shaam bane
Us shaam mein phir mehtaab chaṛha
Phir honṭ ki larzish geet bani
Phir sher, shaoor ka wird hua
Phir khoon se likhe jazbe bhi neelaam hue
Phir dard "Zulaikha" ban baitha
Phir qurb ka karb jawaan hua
Phir mujh pe khula main zinda hoon
Kuch hijr ki nabzein tez hueen
Jab qaid ko taaza umr mili
Us qaidi umr ke bakhton ne
Ik shaam-e-sehoor se pooch liya
Qaid hi rehna tha to humein
Woh pichhla hijr hi kaafi tha
Kyun pichhle jaal ko chhoṛa tha
Kis ahd pe pinjra toṛa tha?
Jab jaal teri kamzori the
Sayyad ko kyun badnaam kiya
Ab soch raha hoon muddat se
Kyun mujh pe khula main zinda hoon?
Kyun dil ko dhaṛakna yaad aaya