رنگّاں وِچّوں رنگ عشق دا، رنگ عشق دا سُوہا — راشد ڈوگر
شاعر
رنگّاں وِچّوں رنگ عشق دا، رنگ عشق دا سُوہا
رنگّاں وِچّوں رنگ عشق دا، رنگ عشق دا سُوہا
عشقے دل دا ویہڑا ملّیا، توڑ کے آیا بُوہا
رنگّاں وِچّوں رنگ عشق دا، رنگ عشق دا پَکّا
عشقے دے سب باندی بَردے، کی کالا، کی ککّا
رنگّاں وِچّوں رنگ عشق دا، رنگ عشق دا نیلا
عشقے ساڈی رَتّ نچوڑی، چہرا ہویا پیلا
رنگّاں وِچّوں رنگ عشق دا، رنگ عشق دا ساوا
عشقے پِچھے پھاوا ہویا، مِٹّی دا ایہ باوا
رنگّاں وِچّوں رنگ عشق دا، رنگ عشق دا چِینا
بولے دل دی دھڑکن دم دم ، ساجن بِن کی جینا
رنگّاں وِچّوں رنگ عشق دا، رنگ عشق دا سُچّا
میں نالی دا کِیڑا مِترا، ماہی دا دَر اُچّا
رنگّاں وِچّوں رنگ عشق دا، رنگ عشق دا گُوہڑا
ماہی میرا عرش دا واسی، میں کِس گنتی چُوہڑا
رنگّاں وِچّوں رنگ عشق دا، رنگ عشق دا کالا
ماہی میرا جُگ جُگ جیوے، جَگ اُس دا متوالا
رنگّاں وِچّوں رنگ عشق دا، رنگ عشق دا رَتّا
عشق دا ساڑا سینہ ساڑے، عشق دا تا اے تَتّا
رنگّاں وِچّوں رنگ عشق دا، رنگ عشق دا نُوری
میں رستے دا کُوڑا کرکٹ، ماہی اے کستُوری
Ranggaan vichchon rang ishq da, rang ishq da sooha
Ranggaan vichchon rang ishq da, rang ishq da sooha
Ishqe dil da veehra milya, todd ke aaya booha
Ranggaan vichchon rang ishq da, rang ishq da pakka
Ishqe de sab bandi barde, ki kaala, ki kakka
Ranggaan vichchon rang ishq da, rang ishq da neela
Ishqe saadi ratt nachodi, chehra hoya peela
Ranggaan vichchon rang ishq da, rang ishq da saawa
Ishqe pichchhe phaawa hoya, mitti da yeh baawa
Ranggaan vichchon rang ishq da, rang ishq da cheena
Bole dil di dhadkan dam dam, sajan bin ki jeena
Ranggaan vichchon rang ishq da, rang ishq da suchcha
Main naali da keeda mitra, maahi da dar uchcha
Ranggaan vichchon rang ishq da, rang ishq da goohda
Maahi mera arsh da waasi, main kis ginti choohda
Ranggaan vichchon rang ishq da, rang ishq da kaala
Maahi mera jug jug jeeve, jag us da matwaala
Ranggaan vichchon rang ishq da, rang ishq da ratta
Ishq da saada seena saade, ishq da ta aye tatta
Ranggaan vichchon rang ishq da, rang ishq da noori
Main raste da kooda karkat, maahi aye kastoori
شاعر کے بارے میں
شاید شاعر، غالباً ادیب، قریباً ان پڑھ، یقیناً گناہگار،سر بہ خاکِ مدینہ
مکمل تعارف پڑھیں