عدو غیر نے تجھ کو دلبر بنایا — رند لکھنوی
شاعر
عدو غیر نے تجھ کو دلبر بنایا
عدو غیر نے تجھ کو دلبر بنایا
کوئی جوڑ مجھ پر مقرر بنایا
کوئی سرو رکھتا نہ تھا راست یہ ہے
ترے قد کو میں نے صنوبر بنایا
کیا میں نے جلاد اسے اپنے حق میں
ستم سہتے سہتے ستم گر بنایا
نہ گنتا تھا کوئی حسینوں میں او بت
تجھے دے کے دل میں نے دلبر بنایا
شکر لب کہا میں نے کڑوے ہوئے تم
عبث منہ کو مجھ سے ستم گر بنایا
عناصر سے خالق نے خلقت بنائی
تجھے نور سے حور پیکر بنایا
ترا عاشق زار روز ازل سے
بنایا مجھے او ستم گر بنایا
بھلا کیا جواب اس کا دے گا تو قاتل
اگر خون کا میں نے محضر بنایا
مری عقل حیراں ہے بار الٰہا
طلسمات دنیا کو کیوں کر بنایا
پڑی جان اڑنے لگا میرے عیسیٰ
روئی کا جو تو نے کبوتر بنایا
ہمہ وقت ممکن نہیں وصل دلبر
ہنسی کھیل کیا جان مضطر بنایا
وہ ہوں صاحب ظرف ہرگز نہ چھلکا
اگر خاک کا میری ساغر بنایا
خیال دہن نے کیا تنگ مجھ کو
کمر کے تصور نے لاغر بنایا
گھلے سوز فرقت میں اس شمع رو کے
یہ حال اپنا کیوں رندؔ جل کر بنایا
رند لکھنوی
Adu-e-ghair ne tujh ko dilbar banaya
Adu-e-ghair ne tujh ko dilbar banaya
Koi jod mujh par muqarrar banaya
Koi sarv rakhta na tha rast yeh hai
Tere qad ko main ne sanobar banaya
Kya main ne jallad use apne haq mein
Sitam sehte sehte sitamgar banaya
Na gunta tha koi haseeno'n mein o but
Tujhe de ke dil main ne dilbar banaya
Shakar-lab kaha main ne kadwe hue tum
Abas muh ko mujh se sitamgar banaya
Anasir se Khaliq ne khalqat banayi
Tujhe noor se hoor-paikar banaya
Tera aashiq-e-zaar roz-e-azal se
Banaya mujhe o sitamgar banaya
Bhala kya jawab is ka dega tu qatil
Agar khoon ka main ne mahzar banaya
Meri aql hairaan hai Bar-e-Ilaha
Tilismat-e-duniya ko kyo'n kar banaya
Padi jaan udne laga mere Isa
Rooi ka jo tu ne kabootar banaya
Hama waqt mumkin nahin vasl-e-dilbar
Hansi khel kya jaan-e-muzter banaya
Woh hoon sahib-e-zarf, hargiz na chhalka
Agar khaak ka meri saghar banaya
Khayal-e-dahan ne kiya tang mujh ko
Kamar ke tasawwur ne laaghar banaya
Ghule soz-e-furqat mein us sham-e-roo ke
Yeh haal apna kyo'n Rind! jal kar banaya
شاعر کے بارے میں
رند لکھنوی اردو کے کلاسیکی دبستانِ لکھنؤ کے ممتاز شاعر تھے جن کا اصل نام نواب سید محمد خاں تھا۔ وہ 1797ء میں فیض آباد، اودھ کے ایک معزز اور نوابی خ...
مکمل تعارف پڑھیں