جلن دل کی لکھیں جو ہم دل جلے — رند لکھنوی

Jalan dil ki likhein jo hum dil jale

Jalan dil ki likhein jo hum dil jale
Zaban-e-qalam mein padein aable
Rah-e-sa'ab-ul-ulfat mein ghabra na dil
Bahut aise pesh aayenge marhale
Na din woh tumhare na apna woh sun
Tumhare hamare woh din sun dhale
Adam ki bhi kya rah hai be-nazeer
Chale jaate hain pesh-o-pas qafile
Woh ab neemcha kar chuke hain alam
Ajal aa chuki sar pe kyun kar tale
Thahar ja koi dam ke mehman hain
Khabar le hamari chale hum chale
Lakeerein bhi mit mit gaeen haath ki
Zabas hum ne dast-e-ta'assuf mile
Rahe dil ke armaan sab dil mein haif
Nikalne na paye mere hausle
Bada ho budhape ka sab kho diya
Na meri jawani na woh walwale
Gada koi le kar dil muztarib
Mazaron mein aane lage zalzale
Siyah kaariyon mein kati umr sab
Qalam ki tarah sar ke bal go chale
Mohabbat buton ki ye dil chhod de
Kisi tarah chhaati se patthar tale
Shikayat ka mauqa na tha wasl mein
Ke thi rah thodi bahut the gale
Koi dam mein hai naqsh-e-hasti fana
Kidhar dhyan hai tera o baawle
Kinar-e-lahad mein pade hain woh aaj
Jo aaghosh-e-maadar mein the kal pale
Gala tegh-e-qatil se ragda kiya
Na jhachka zara wah re manchale
Na laya koi shama' o gul gor par
Lahad mein bhi dagh-e-mohabbat jale
Chale bagh-e-hasti se hum namuraad
Kisi rut mein aye gul na phoole phale
Azal se hain ushshaq mazbooh-e-husn
Jo manind-e-mahi kate hain gale
Jo faryadi tere bhi aa nikle waan
Zameen hogi mahshar ki upar tale
Jo abroo ke honge ishaare yunhi
Meri jaan lakhon katein ge gale
Ki'e jaaye kawish palak yaar ki
Abhi dil ke phoote nahin aable
Sara mein na ghafil ho baandho kamar
Chalo saath walo chalo hum chale
Rahe mera jism-e-misali sahi
Bala se ye putla sade ya gale
Ye sab sar zameen fitna angez hai
Hazaron hi uthte hain yaan ghalghale
Nazar bhar ke phir dekh loon shakal-e-yar
Jo aai hui meri dam bhar tale
Hamesha raha dagh dagh apna jism
Sada misl-e-sarv charaghan jale
Falak ko milana tha gar khaak mein
To phir naaz-o-nemat se kyun hum pale
Rahe bar war shakh-e-nakhl-e-murad
Ilahi hamesha tu phoole phale
Zamaane pe afsurdagi chha gai
Na hain ab woh charche na woh mashghale
Musafir huun dilwaunga nazr-e-khizr
Jo tay honge raste ke sab marhale
Lahu shab se aata hai ashkon ke saath
Kaleje ke naasoor shayad chhale
Basar ho gai is tamanna mein umr
Koi dost yak rang mujh ko mile
Ye kya rog ab ho gaya Rind ko
Kai saal idhar tak the change bhale