کھلی ہے کنج قفس میں مری زباں صیاد — رند لکھنوی

Khuli hai kunj-e-qafas mein meri zaban sayaad

Khuli hai kunj-e-qafas mein meri zaban sayaad
Main majra-e-chaman kya karoon bayan sayaad
Dikhaaye ga na agar sair-e-bustaan sayaad
Phadak phadak ke qafas hi mein doon ga jaan sayaad
Jahan gaya main gaya le ke daam waan sayaad
Phira talash mein meri kahan kahan sayaad
Dikhaaya kunj-e-qafas mujh ko aab o daane ne
Wagarna daam kahan main kahan kahan sayaad
Ujada mausam-e-gul hi mein aashiyan mera
Ilahi toot pade tujh pe aasman sayaad
Main kheenchoon daam mein bulbul to aashiyan jala
Baham ye mashwara karte hain baaghban sayaad
Ajeeb qissa hai dilchasp ek hikayat hai
Sunaunga gul o bulbul ki dastaan sayaad
Na gul khilen ge na chehkaaye ga koi bulbul
Bahar-e-bagh ko hone to de khizan sayaad
Humaye zinda ghaseete ga daam mein shayad
Bajaaye dana bichhata hai ustukhwan sayaad
Khabar nahin kise kehte hain gul chaman kaisa
Qafas ko jaante hain hum to aashiyan sayaad
Udaas dekh ke mujh ko chaman dikhata hai
Kai baras mein hua hai mizaj daan sayaad
Rahe na qabil-e-parwaz baal o par mere
Qafas se ud ke main ab jaaunga kahan sayaad
Qafas ko sham se latka ke farsh-e-khwab ke paas
Suna kya meri ta subh dastaan sayaad
Kare ga yaad mere zamzamon ko ba'ad mere
Hoon chand roz tere ghar mein mehman sayaad
Sunaaun waqia apna tujhe tamaam o kamaal
Jo gosh-e-dil se sune meri dastaan sayaad
Sitam ziyada na kar hukm de rihai ka
Pukarte hain giraftar al-amaan sayaad
Chaman mein bulbul o qumri ka par na chhodega
Raha jab aath pehar ghaat mein nihan sayaad
Hazaar murgh-e-khush-alhan chehakte hain har soo
Ba iz chaman hua ab to tera makan sayaad
Main jhaankta nahin chaak-e-qafas se bhi gul ko
Na hoi ta meri jaanib se bad gumaan sayaad
Aseer-e-kunj-e-qafas kar ba shauq daam mein kheench
Qaza le aai hai mujh ko kashaan kashaan sayaad
Paron ko khol de zaalim jo band karta hai
Qafas ko le ke main ud jaaun ga kahan sayaad
Na hoonga band-e-qafas mein bhi main woh bulbul huun
Hazaar tujh ko sunaunga dastaan sayaad
Dar-e-qafas bhi khule ga to ab na jaaunga
Yaqeen na hove to kar mera imtehan sayaad
Raha bhi ho ke na bhoolunga haq-e-khidmat ko
Ada-e-shukr karunga main har zaban sayaad
Chaman mein bulbul o qumri ka par na chhodega
Raha jab aath pehar ghaat mein nihan sayaad
Qafas pe rakhne laga ab to haar phoolon ke
Hazaar shukr hua mujh pe mehrban sayaad
Azeez rakhta hai karta hai khaatirain meri
Mila hai khoobi-e-qismat se qadardaan sayaad
Nikaaliyo na qadam aashiyan se o bulbul
Lagaaye baithe hain phande jahan tahan sayaad
Woh andaleeb huun jal kar karoon jo nala-e-garm
Qafas ke chaakon se uthne lage dhuan sayaad
Mere bayan ko sun sun ke kaanp kaanp utha
Ghazab ye hai ke samajhta nahin zaban sayaad
Ilahi dekhiye kyun kar nibah hota hai
Zaban daraz huun main aur bad zaban sayaad
Sawaaye shukr shikayat agar kabhi ki ho
Ilahi qat'a ho minqar se zaban sayaad
Fareb-e-dana na khata main zinhaar aye Rind
Na karta daam agar khaak mein nihan sayaad