لفظوں کے درمیان — ثروت حسین
شاعر
لفظوں کے درمیان
دیکھتے ہی دیکھتے انہوں نے سیارے کو لفظوں سے بھر دیا
فیصلوں اور فاصلوں کو طول دینے کا فن انہیں خوب آتا ہے
جہاز بندرگاہوں میں کھڑے ہیں
اور گھروں، گوداموں، دکانوں میں
کسی لفظ کے لئے جگہ نہیں رہی
اتنے بہت سے لفظ۔۔۔ اف خدایا!
مجھے اس زمین پر چلتے ہوئے اٹھائیس برس ہو گئے
باپ، ماں، بہنوں، بھائیوں اور محبوباؤں کے درمیان
انسانوں کے درمیان
میں نے دیکھا
ان تعریفوں، تعارفوں اور تعزیتوں کے لیے
ان کے پاس لرزتے ہوئے ہونٹ ہیں
ڈبڈبائی ہوئی آنکھیں ہیں
گرم ہتھیلیاں ہیں
انہیں کسی ابلاغ کی ضرورت نہیں
نان بائی گنگناتا ہے
اسے لفظ نہیں چاہئے
ایک ناند۔۔۔ آٹا گوندھنے کے لئے
ایک تختہ۔۔۔ پیڑے بنانے کے لئے
ایک سلاخ تنور سے روٹی نکالنے کے لئے
نان بائی کا کام ختم کر لو تو میرے پاس آنا
یہاں کنارے پر سرکنڈوں کا جنگل آپ ہی آپ اگ آیا ہے
کچھ قلم میں نے تراشے ہیں
اور ایک بانسری۔۔۔
باقی سرکنڈوں سے ایک کشتی بنائی ہے
گڈریا، کسان، کاشتکار، موسیقار، آہن گر
سب تیار ہیں
کچھ آوازیں کشتی میں رکھ لی ہیں
مدرسے کی گھنٹی۔۔۔
ایک لوری
اور ایک دعا
ایک نئی زمین پر زندہ رہنے کے لئے اس سے زیادہ کچھ نہیں چاہئے
Lafzon ke Darmiyan
Dekhte hi dekhte unhon ne siyaare ko lafzon se bhar diya
Faislon aur faaslon ko tool dene ka fan unhein khoob aata hai
Jahaz bandargaahon mein khaṛe hain
Aur gharon, godaamon, dukaanoon mein
Kisi lafz ke liye jagah nahin rahi
Itne bahut se lafz... Uff Khudaaya!
Mujhe iss zameen par chalte hue aṭṭhāees baras ho gaye
Baap, Maa, behnon, bhaiyon aur mehboobaon ke darmiyaan
Insaanon ke darmiyaan
Maine dekha
In tareefon, ta'arufon aur ta'ziyaton ke liye
Un ke paas larazte hue honṭh hain
Ḍabḍabaayi hui aankhein hain
Garm hatheliyaan hain
Unhein kisi iblagh ki zaroorat nahin
Naanbaai gungunata hai
Use lafz nahin chahiye
Ek naand... aaṭa goondhne ke liye
Ek takhta... peṛe banaane ke liye
Ek salaakh tanoor se roti nikaalne ke liye
Naanbaai ka kaam khatam kar lo toh mere paas aana
Yahaan kinaare par sarkanḍon ka jangal aap hi aap ug aaya hai
Kuch qalam maine tarashe hain
Aur ek baansuri...
Baaqi sarkanḍon se ek kashti banaayi hai
Gaḍriya, kisaan, kaashtkaar, musiqaar, aahan-gar
Sab tayyar hain
Kuchh aawazein kashti mein rakh li hain
Madarse ki ghanṭi...
Ek lori
Aur ek dua
Ek nayi zameen par zinda rehne ke liye iss se zyada kuchh nahin chahiye
شاعر کے بارے میں
ثروت حسین اردو کے جدید اور صاحبِ طرز شاعر تھے جنہوں نے کم عمری میں ہی اپنی تخلیقی صلاحیتوں کا لوہا منوا لیا۔ وہ 9 نومبر 1949ء کو کراچی میں پیدا ہوئ...
مکمل تعارف پڑھیں