آنکھیں مری تلووں سے وہ مل جائے تو اچھا — شیخ ابراہیم ذوق
شاعر
آنکھیں مری تلووں سے وہ مل جائے تو اچھا
آنکھیں مری تلووں سے وہ مل جائے تو اچھا
ہے حسرت پابوس نکل جائے تو اچھا
جو چشم کہ بے نم ہو وہ ہو کور تو بہتر
جو دل کہ ہو بے داغ وہ جل جائے تو اچھا
بیمار محبت نے لیا تیرے سنبھالا
لیکن وہ سنبھالے سے سنبھل جائے تو اچھا
ہو تجھ سے عیادت جو نہ بیمار کی اپنے
لینے کو خبر اس کی اجل جائے تو اچھا
کھینچے دل انساں کو نہ وہ زلف سیہ فام
اژدر کوئی گر اس کو نگل جائے تو اچھا
تاثیر محبت عجب اک حب کا عمل ہے
لیکن یہ عمل یار پہ چل جائے تو اچھا
دل گر کے نظر سے تری اٹھنے کا نہیں پھر
یہ گرنے سے پہلے ہی سنبھل جائے تو اچھا
فرقت میں تری تار نفس سینے میں میرے
کانٹا سا کھٹکتا ہے نکل جائے تو اچھا
اے گریہ نہ رکھ میرے تن خشک کو غرقاب
لکڑی کی طرح پانی میں گل جائے تو اچھا
ہاں کچھ تو ہو حاصل ثمر نخل محبت
یہ سینہ پھپھولوں سے جو پھل جائے تو اچھا
وہ صبح کو آئے تو کروں باتوں میں دوپہر
اور چاہوں کہ دن تھوڑا سا ڈھل جائے تو اچھا
ڈھل جائے جو دن بھی تو اسی طرح کروں شام
اور چاہوں کہ گر آج سے کل جائے تو اچھا
جب کل ہو تو پھر وہ ہی کہوں کل کی طرح سے
گر آج کا دن بھی یوں ہی ٹل جائے تو اچھا
القصہ نہیں چاہتا میں جائے وہ یاں سے
دل اس کا یہیں گرچہ بہل جائے تو اچھا
ہے قطع رہ عشق میں اے ذوقؔ ادب شرط
جوں شمع تو اب سر ہی کے بل جائے تو اچھا
Aankhein meri talwon se woh mil jaaye toh achha
Aankhein meri talwon se woh mil jaaye toh achha
Hai hasrat-e-pabos nikal jaaye toh achha
Jo chashm ke be-nam ho woh ho koor toh behtar
Jo dil ke ho be-daagh woh jal jaaye toh achha
Beemar-e-mohabbat ne liya tere sambhala
Lekin woh sambhale se sambhal jaaye toh achha
Ho tujh se iyadat jo na beemar ki apne
Lene ko khabar us ki ajal jaaye toh achha
Kheenchiye dil-e-insaan ko na woh zulf-e-siyah-faam
Azhdar koi gar is ko nigal jaaye toh achha
Taseer-e-mohabbat ajab ek hubb ka amal hai
Lekin ye amal yaar pe chal jaaye toh achha
Dil gir ke nazar se teri uthne ka nahin phir
Ye girne se pehle hi sambhal jaaye toh achha
Furqat mein teri taar-e-nafas seene mein mere
Kaanta sa khatakta hai nikal jaaye toh achha
Aye girya na rakh mere tan-e-khushk ko gharqaab
Lakdi ki tarah paani mein ghul jaaye toh achha
Haan kuch toh ho hasil-e-samar-e-nakhl-e-mohabbat
Ye seena phaphoolon se jo phul jaaye toh achha
Woh subh ko aaye toh karoon baaton mein dopahar
Aur chahoon ke din thoda sa dhal jaaye toh achha
Dhal jaaye jo din bhi toh isi tarah karoon shaam
Aur chahoon ke gar aaj se kal jaaye toh achha
Jab kal ho toh phir woh hi kahoon kal ki tarah se
Gar aaj ka din bhi yoon hi tal jaaye toh achha
Alqissa nahin chahta main jaaye woh yahan se
Dil us ka yahin garche behal jaaye toh achha
Hai qata-e-rah-e-ishq mein aye Zauq adab shart
Jun shama tu ab sar hi ke bal jaaye toh achha
شاعر کے بارے میں
شیخ محمد ابراہیم ذوقؔ اردو کے اُن ممتاز شعرا میں شمار ہوتے ہیں جنہوں نے دہلی کے آخری مغل عہد میں شاعری کو دربار سے عوام تک مؤثر انداز میں پہنچایا۔ ...
مکمل تعارف پڑھیں