اب تو گھبرا کے یہ کہتے ہیں کہ مر جائیں گے — شیخ ابراہیم ذوق
شاعر
اب تو گھبرا کے یہ کہتے ہیں کہ مر جائیں گے
اب تو گھبرا کے یہ کہتے ہیں کہ مر جائیں گے
مر کے بھی چین نہ پایا تو کدھر جائیں گے
تم نے ٹھہرائی اگر غیر کے گھر جانے کی
تو ارادے یہاں کچھ اور ٹھہر جائیں گے
خالی اے چارہ گرو ہوں گے بہت مرہم داں
پر مرے زخم نہیں ایسے کہ بھر جائیں گے
پہنچیں گے رہ گزر یار تلک کیوں کر ہم
پہلے جب تک نہ دو عالم سے گزر جائیں گے
شعلۂ آہ کو بجلی کی طرح چمکاؤں
پر مجھے ڈر ہے کہ وہ دیکھ کے ڈر جائیں گے
ہم نہیں وہ جو کریں خون کا دعویٰ تجھ پر
بلکہ پوچھے گا خدا بھی تو مکر جائیں گے
آگ دوزخ کی بھی ہو جائے گی پانی پانی
جب یہ عاصی عرق شرم سے تر جائیں گے
نہیں پائے گا نشاں کوئی ہمارا ہرگز
ہم جہاں سے روش تیر نظر جائیں گے
سامنے چشم گہر بار کے کہہ دو دریا
چڑھ کے گر آئے تو نظروں سے اتر جائیں گے
لائے جو مست ہیں تربت پہ گلابی آنکھیں
اور اگر کچھ نہیں دو پھول تو دھر جائیں گے
رخ روشن سے نقاب اپنے الٹ دیکھو تم
مہر و مہ نظروں سے یاروں کی اتر جائیں گے
ہم بھی دیکھیں گے کوئی اہل نظر ہے کہ نہیں
یاں سے جب ہم روش تیر نظر جائیں گے
ذوقؔ جو مدرسے کے بگڑے ہوئے ہیں ملا
ان کو مے خانے میں لے آؤ سنور جائیں گے
Ab to ghabrā ke ye kahte haiñ ki mar jā.eñge
Ab to ghabrā ke ye kahte haiñ ki mar jā.eñge
Mar ke bhī chain na pāyā to kidhar jā.eñge
Tum ne Thahrā.ī agar ġhair ke ghar jaane kī
To irāde yahāñ kuchh aur Thahar jā.eñge
Khālī ai chāra-garo hoñge bahut marham-dāñ
Par mire zaḳhm nahīñ aise ki bhar jā.eñge
Pahuñcheñge rah-guzar-e-yār talak kyūñkar ham
Pahle jab tak na do ālam se guzar jā.eñge
Shola-e-āh ko bijlī kī tarah chamkāūñ
Par mujhe ḍar hai ki vo dekh ke ḍar jā.eñge
Ham nahīñ vo jo kareñ ḳhūn kā da'vā tujh par
Balki pūchhegā ḳhudā bhī to mukar jā.eñge
Aag dozakh kī bhī ho jā.egī pānī pānī
Jab ye āṣī araq-e-sharm se tar jā.eñge
Nahīñ pā.egā nishāñ koī hamārā hargiz
Ham jahāñ se ravish-e-tīr-e-nazar jā.eñge
Sāmne chashm-e-gauhar-bār ke kah do dariyā
Chaṛh ke gar aa.e to nazroñ se utar jā.eñge
Lā.e jo mast haiñ turbat pe gulābī āñkheñ
Aur agar kuchh nahīñ do phūl to dhar jā.eñge
Ruḳh-e-raushan se naqāb apne ulaṭ dekho tum
Mehr-o-mah nazroñ se yāroñ kī utar jā.eñge
Ham bhī dekheñge koī ahl-e-nazar hai ki nahīñ
Yāñ se jab ham ravish-e-tīr-e-nazar jā.eñge
Zauqؔ jo madarse ke bigaṛe hue haiñ mullā
Un ko mai-ḳhāne meñ le aao sañvar jā.eñge
شاعر کے بارے میں
شیخ محمد ابراہیم ذوقؔ اردو کے اُن ممتاز شعرا میں شمار ہوتے ہیں جنہوں نے دہلی کے آخری مغل عہد میں شاعری کو دربار سے عوام تک مؤثر انداز میں پہنچایا۔ ...
مکمل تعارف پڑھیں