چشم قاتل ہمیں کیونکر نہ بھلا یاد رہے — شیخ ابراہیم ذوق
شاعر
چشم قاتل ہمیں کیونکر نہ بھلا یاد رہے
چشم قاتل ہمیں کیونکر نہ بھلا یاد رہے
موت انسان کو لازم ہے سدا یاد رہے
میرا خوں ہے ترے کوچے میں بہا یاد رہے
یہ بہا وہ نہیں جس کا نہ بہا یاد رہے
کشتۂ زلف کے مرقد پہ تو اے لیلی وش
بید مجنوں ہی لگا تاکہ پتا یاد رہے
خاکساری ہے عجب وصف کہ جوں جوں ہو سوا
ہو صفا اور دل اہل صفا یاد رہے
ہو یہ لبیک حرم یا یہ اذان مسجد
مے کشو قلقل مینا کی صدا یاد رہے
یاد اس وعدہ فراموش نے غیروں سے بدی
یاد کچھ کم تو نہ تھی اور سوا یاد رہے
خط بھی لکھتے ہیں تو لیتے ہیں خطائی کاغذ
دیکھیے کب تک انہیں میری خطا یاد رہے
دو ورق میں کف حسرت کے دو عالم کا ہے علم
سبق عشق اگر تجھ کو دلا یاد رہے
قتل عاشق پہ کمر باندھی ہے اے دل اس نے
پر خدا ہے کہ اسے نام مرا یاد رہے
طائر قبلہ نما بن کے کہا دل نے مجھے
کہ تڑپ کر یوں ہی مر جائے گا جا یاد رہے
جب یہ دیں دار ہیں دنیا کی نمازیں پڑھتے
کاش اس وقت انہیں نام خدا یاد رہے
ہم پہ سو بار جفا ہو تو رکھو ایک نہ یاد
بھول کر بھی کبھی ہووے تو وفا یاد رہے
محو اتنا بھی نہ ہو عشق بتاں میں اے ذوقؔ
چاہیئے بندے کو ہر وقت خدا یاد رہے
Chashm-e-qaatil hamein kyunkar na bhala yaad rahe
Chashm-e-qaatil hamein kyunkar na bhala yaad rahe
Maut insaan ko laazim hai sada yaad rahe
Mera khoon hai tere kuche mein baha yaad rahe
Ye baha woh nahin jis ka na baha yaad rahe
Kushta-e-zulf ke marqad pe tu aye Laila-wash
Bed-e-Majnuun hi laga taake pata yaad rahe
Khaaksari hai ajab vasf ke jyun jyun ho sawa
Ho safa aur dil-e-ahl-e-safa yaad rahe
Ho ye labbaik-e-haram ya ye azaan-e-masjid
Mai-kasho qalqal-e-meena ki sada yaad rahe
Yaad us wa'da-faramosh ne ghairon se badi
Yaad kuch kam to na thi aur sawa yaad rahe
Khat bhi likhte hain to lete hain khtaai kaaghaz
Dekhiye kab tak unhein meri khata yaad rahe
Do waraq mein kaff-e-hasrat ke do aalam ka hai ilm
Sabaq-e-ishq agar tujh ko dila yaad rahe
Qatl-e-ashiq pe kamar baandhi hai aye dil us ne
Par Khuda hai ke use naam mera yaad rahe
Taa'ir qibla-numa ban ke kaha dil ne mujhe
Ke tadap kar yoon hi mar jaayega ja yaad rahe
Jab ye deen-daar hain duniya ki namazein padhte
Kaash us waqt unhein naam-e-Khuda yaad rahe
Hum pe sau baar jafa ho to rakho ek na yaad
Bhool kar bhi kabhi huwe to wafa yaad rahe
Mahv itna bhi na ho ishq-e-butaan mein aye Zauq
Chahiye bande ko har waqt Khuda yaad rahe
شاعر کے بارے میں
شیخ محمد ابراہیم ذوقؔ اردو کے اُن ممتاز شعرا میں شمار ہوتے ہیں جنہوں نے دہلی کے آخری مغل عہد میں شاعری کو دربار سے عوام تک مؤثر انداز میں پہنچایا۔ ...
مکمل تعارف پڑھیں