ایک اور سال گرہ — شہریار

Ek aur saal girah

Lo teeswaan saal bhi beet gaya
Lo baal roopahli hone lage
Lo kaasa-e-chashm hua khaali
Lo dil mein nahin ab dard koi
Ye tees baras kaise kaate
Ye tees baras kaise guzre
Aasaan sawaal hai kitna ye!
Ma'loom hai mujh ko ye duniya
Kis tarah wujood mein aayi hai
Kis tarah fana hogi ik din
Ma'loom hai mujh ko insaan ne
Kis tarah se ki takhleeq Khuda
Kis tarah buton ko paida kiya
Ma'loom hai mujh ko main kya hoon
Kis waaste ab tak zinda hoon
Ik us ke jawaab ka ilm nahin
Ye tees baras kaise kaate
Haan yaad hai itna main ik din
Toffee ke liye roya tha bahut
Amma ne mujhe peeta tha bahut
Haan yaad hai itna main ik din
Titli ka ta'aqub karte hue
Ik ped se ja takraya tha
Haan itna yaad hai main ik din
Neendon ke dayaar mein sapnon ki
Pariyon se lipat kar soya tha
Haan itna yaad hai main ik din
Ghar waalon se apne lad bhid ke
Tod aaya tha sab rishte naate
Haan itna yaad hai main ik din
Jab bahut dukhi tha tanha tha
Ik jism ki aag mein pighla tha
Haan ye bhi yaad hai main ik din
Sach bol ke pachtaya tha bahut
Apne se bhi sharmaya tha bahut
Haan ye bhi yaad hai mujh ko ke main
Jab bahut hi be-kal hota tha
Ash'aar bhi likha karta tha
Haan ye bhi yaad hai mujh ko ke main
Roti rozi ki tamanna mein
Bada khwaar hua is duniya mein
Haan aur bhi kuch hai yaad mujhe
Magar is ka jawaab kahan ye sab
Ye tees baras kaise guzre
Ye tees baras kaise kaate
Ab is ke jawaab se kya hoga
Chalo utho ke subah hui dekho
Chalo utho ke apna kaam karein
Chalo utho ke shahar-e-tamanna mein
Marham dhoondein un zakhmon ka
Jo dil ne abhi tak khaaye nahin
Ta'beer karein un khwaabon ki
Jo aankhon ne dikhlaaye nahin
Un lamhon ke hum raaz banein
Jo zist mein apni aaye nahin
Chalo teeswaan saal bhi beet gaya
Chalo mai chhalakayein jashn karein
Chalo sar ko jhukayein sajde mein
Is umr-e-faromaaya ka safar
Aadhe se zyada khatm hua