کیوں — ادا جعفری
شاعر
کیوں
تم جو قاتل نہ مسیحا ٹھہرے
نہ علاج شب ہجراں نہ غم چارہ گراں
نہ کوئی دشنۂ پنہاں
نہ کہیں خنجر سم آلودہ
نہ قریب رگ جاں
تم تو اس عہد کے انساں ہو جسے
وادی مرگ میں جینے کا ہنر آتا تھا
مدتوں پہلے بھی جب رخت سفر باندھا تھا
ہاتھ جب دست دعا تھے اپنے
پانو زنجیر کے حلقوں سے کٹے جاتے تھے
لفظ تقصیر تھے
آواز پہ تعزیریں تھیں
تم نے معصوم جسارت کی تھی
اک تمنا کی عبادت کی تھی
پا برہنہ تھے تمہارے
یہی بوسیدہ قبا تھی تن پر
اور یہی سرخ لہو کے دھبے
جنہیں تحریر گل و لالہ کہا تھا تم نے
ہر نظارہ پہ نظارگی جاں تم کو
ہر گلی کوچۂ محبوب نظر آئی تھی
رات کو زلف سے تعبیر کیا تھا تم نے
تم بھلا کیوں رسن و دار تک آ پہنچے ہو
تم نہ منصور نہ عیسیٰ ٹھہرے
Kyun
Tum jo qatil na Maseeha thehre
Na ilaaj-e-shab-e-hijran na gham-e-chara-garan
Na koi dashna-e-pinhan
Na kahin khanjar-e-sam-alooda
Na qareeb-e-rag-e-jaan
Tum to us ahad ke insaan ho jise
Wadi-e-marg mein jeene ka hunar aata tha
Muddaton pehle bhi jab rakht-e-safar baandha tha
Haath jab dast-e-dua the apne
Paon zanjeer ke halqon se kate jate the
Lafz taqseer the
Aawaz pe taazirein thi
Tum ne masoom jasarat ki thi
Ek tamanna ki ibadat ki thi
Pa barehna the tumhare
Yehi boseeda qaba thi tan par
Aur yehi surkh lahoo ke dhabbe
Jinhein tehreer-e-gul o lala kaha tha tum ne
Har nazare pe nazaragi-e-jaan tum ko
Har gali koocha mehboob nazar aayi thi
Raat ko zulf se tabeer kiya tha tum ne
Tum bhala kyun rasan o daar tak aa pohnche ho
Tum na Mansoor na Essa thehre
شاعر کے بارے میں
ادا جعفری، جن کا اصل نام عزیز جہاں تھا، 22 اگست 1924ء کو بدایوں، برطانوی ہندوستان میں پیدا ہوئیں۔ تین سال کی عمر میں ان کے والد مولوی بدرالحسن کے ا...
مکمل تعارف پڑھیں