توفیق سے کب کوئی سروکار چلے ہے — ادا جعفری
شاعر
توفیق سے کب کوئی سروکار چلے ہے
توفیق سے کب کوئی سروکار چلے ہے
دنیا میں فقط طالع بیدار چلے ہے
ٹھہروں تو چٹانوں سی کلیجے پہ کھڑی ہے
جاؤں تو مرے ساتھ ہی دیوار چلے ہے
ہر غنچہ بڑے چاؤ سے کھلتا ہے چمن میں
ہر دور کا منصور سر دار چلے ہے
رنگوں کی نہ خوشبو کی کمی ہے دل و جاں کو
توشہ جو چلے ساتھ وہ اک خار چلے ہے
دل کے لیے بس آنکھ کا معیار بہت ہے
جو سکۂ جاں ہے سر بازار چلے ہے
حیرت سے شگوفوں کی جھپکتی نہیں آنکھیں
کس آن سے کانٹوں کا خریدار چلے ہے
خورشید وہاں ہم نے سلگتے ہوئے دیکھے
کرنوں کا جس آشوب میں بیوپار چلے ہے
اک جنبش مژگاں کی اجازت بھی نہیں ہے
دل ساتھ چلا ہے کہ ستم گار چلے ہے
تھے خضر بھی لاکھوں یہاں عیسیٰ بھی بہت تھے
آزار جو دل کا ہے سو آزار چلے ہے
Taufeeq se kab koi sarokar chale hai
Taufeeq se kab koi sarokar chale hai
Dunya mein faqat tale-e-bedar chale hai
Thehroon to chattano si kaleje pe khadi hai
Jaaun to mere saath hi deewar chale hai
Har ghuncha bade chao se khilta hai chaman mein
Har daur ka Mansoor sar dar chale hai
Rangon ki na khushboo ki kami hai dil o jaan ko
Toshe jo chale saath wo ek khaar chale hai
Dil ke liye bas aankh ka mayaar bahut hai
Jo sikka-e-jaan hai sar bazaar chale hai
Hairat se shagufo ki jhapakti nahin aankhein
Kis aan se kaanton ka khareedar chale hai
Khurshid wahan hum ne sulagte hue dekhe
Kirnon ka jis ashoob mein beopar chale hai
Ek jumbish-e-mizhgaan ki ijazat bhi nahin hai
Dil saath chala hai ke sitamgar chale hai
The Khizr bhi laakhon yahan Essa bhi bahut the
Aazar jo dil ka hai so aazar chale hai
شاعر کے بارے میں
ادا جعفری، جن کا اصل نام عزیز جہاں تھا، 22 اگست 1924ء کو بدایوں، برطانوی ہندوستان میں پیدا ہوئیں۔ تین سال کی عمر میں ان کے والد مولوی بدرالحسن کے ا...
مکمل تعارف پڑھیں