بت ساز — اختر عثمان
شاعر
بت ساز
میں نے کیا سوچ کے صحرا میں دکاں کھولی ہے
لب لعلیں کے تصور میں منگائے یاقوت
نجم لایا ہوں کہ ترتیب ہو سلک دنداں
مہ یک رو بھی تو درکار ہے ابرو کے لئے
دور افق پار سے تھوڑی سی شفق لایا ہوں
خون میں گوندھ کے بھٹی میں تپاؤں گا اسے
تب کہیں سرخیٔ رخسار ہویدا ہوگی
میں نے تیار کیا خاک کواکب سے خمیر
کچھ نہیں کچھ بھی نہیں آج عزا خانے میں
آج خس خانۂ خواہش میں فقط راکھ ہے راکھ
وہ کسی دست ہنر ور کا تراشا ہوا تل
کف ضو ریز کو شرماتا تھا ماہ کامل
وہ تری ساعد سیمیں کا زمرد بھی خجل
کچھ نہیں کچھ بھی نہیں آج عزا خانے میں
آج بھی سوچتا ہوں اپنے جنوں میں آ کر
میں نے کیا سوچ کے صحرا میں دکاں کھولی تھی
اختر عثمان
but-saz
main ne kya soch ke sahra mein dukan kholi hai
lab-e-laaleen ke tasavvur mein mangaye yaaqut
najm laya hoon ki tartib ho silk-e-dandan
mah-e-yak-ru bhi to darkar hai abru ke liye
door ufuq par se thodi si shafaq laya hoon
khoon mein gondh ke bhatti mein tapaoon ga use
tab kahin surkhi-e-rukhsar huweda hogi
main ne tayyar kiya khaak-e-kawākib se khameer
kuchh nahin kuchh bhi nahin aaj aza-khana mein
aaj khas khana-e-khwahish mein faqat rakh hai rakh
wo kisi dast-e-hunarwar ka tarasha hua til
kaf-e-zau-rez ko sharmata tha mah-e-kamil
wo teri saa'id-e-simin ka zumurrud bhi khajil
kuchh nahin kuchh bhi nahin aaj aza-khana mein
aaj bhi sochta hoon apne junoon mein aa kar
main ne kya soch ke sahra mein dukan kholi thi
شاعر کے بارے میں
اختر عثمان عہدِ حاضر کے اُن اہم اردو شعرا میں شمار ہوتے ہیں جنہوں نے جدید اردو شاعری کو سماجی شعور، فکری گہرائی اور داخلی کرب کے نئے زاویے عطا کیے۔ ان کا اصل نام اختر محمود ہے اور وہ 4 اپریل 1969ء کو اسلام آباد میں پیدا ہوئے، جبکہ ان کا آبائی تعلق ڈیرہ غازی خان سے ہے۔ ان کی ابتدائی زندگی راولپنڈی میں گزری جہاں انہوں نے سینٹ پالز کیمبرج اسکول سے ...
مکمل تعارف پڑھیں