نئے سر کی تمثیل — اختر عثمان

naye sur ki tamsil

kaamni khwab ki lau mein hansti hui kaamni
solah baras ki taqvim mein fasl-e-gul ka koi tazkira
tak na tha
main ne batis batis jhad riten kaat din
ab jo tamsil ke ek waqfe mein tum se mila hoon
to sanson mein nam chaal mein un zamanon ka ram
ji utha hai
jo ahd-e-zamistan mein yakh the
saqar sa saqar
kaamni khanda-e-gul ki kul zindagi
ek gulchin ki wahshat bhari aankh hai
yeh chatakna yeh khulna
bahut sehr-awar sahi jaagne aur sone mein ek
khwab-e-mauhoom se kuchh zyada nahin
khwab o khwahish ajab silsila hai
bahut door bahti hui aabsharon ka ek silsila
jis mein koh-e-tazabzub ki khushboo bhi hai
ahd o paiman ka jadu bhi
khoon se suron tak
suron se is ek lafz tak
jis mein raagon ka jauhar bandha hai
kahin aimani ras kahin marwa thaath bhageshri
bheriyon aur pahadi
wo sab kuchh jo apne lahoo mein dehekta chehekta hai
jis ke tanazur mein hum bist-o-shash saal
pehley bandhe the
inhi aabsharon se mujh ko sada aa rahi hai
so main ja raha hoon
naye sur uthane
ki sargam ki farsudgi deeda o dil bujhane lagi hai
naya sur jise lafz tartib dete hain
pahunche to jaano ki saane' ke lafzon se uthti nami tum
tak aayi
pas umr ka hasil fan jaise sarfa-e-jaan
kahin kuchh nahin
bist o shash saal dar khidmat-e-fan basar karda am
ba chashm-e-nam awraq tar karda am
dar faqiri guzar karda am
harf sar karda am
yeh jo lafzon ki paighambari hai na hoti to ibrat
sara mein bhala kaun jiita
main lafzon mein siskaarta hoon
suna tum ne sur
naghma-e-taza ka yeh kitne qarnon se dil mein kisi
sil ki surat jama tha
yeh ju-e-rawan tum tak aayi magar kitne
khurshid o mahtaab aahang
bante hue bujh gaye
kitne din gul hue
kitni raaten dhaleen
khair kaisa hisab
aise naghmon mein khoon aur chiraghon ke roghan ka ek
pursha kise doon
bhala koi aza-dar hai
pursha-daron ki tamsil mein koi waqfa nahin