جب سے باندھا ہے تصور اس رخ پر نور کا — امیر مینائی
شاعر
جب سے باندھا ہے تصور اس رخ پر نور کا
جب سے باندھا ہے تصور اس رخ پر نور کا
سارے گھر میں نور پھیلا ہے چراغ طور کا
بخت واژوں سے جلے کیوں دل نہ مجھ محرور کا
مرہم کافور سے منہ آ گیا ناسور کا
اس قدر مشتاق ہوں زاہد خدا کے نور کا
بت بھی بنوایا کبھی میں نے تو سنگ طور کا
تجھ کو لائے گھر میں جنت کو جلایا رشک سے
ہم بغل تجھ سے ہوئے پہلو دبایا حور کا
گور کافر کس لیے ہے تیرہ و تار اس قدر
پڑ گیا سایہ مگر میری شب دیجور کا
حسن یوسف اور تیرے حسن میں اتنا ہے فرق
چوٹ یہ نزدیک کی ہے وار تھا وہ دور کا
قصر تن بگڑا کسی کا گورکن کی بن پڑی
گھر کسی کا گر پڑا گھر بن گیا مزدور کا
چہرۂ جاناں سے شرما کر چھپایا خلد میں
خامۂ تقدیر نے کھینچا جو نقشہ حور کا
حاجت مشاطہ کیا رخسار روشن کے لیے
دیکھ لو گل کاٹتا ہے کون شمع طور کا
زلف و روئے یار سے نیرنگ قدرت ہے عیاں
مہر کے پنجے میں ہے دامن شب دیجور کا
خاکساری کر جو ہو منظور آنکھوں میں جگہ
خاک ہو کر سرمہ بن جاتا ہے پتھر طور کا
غافلوں کے کان کب کھلتے ہیں سن کر شور حشر
سونے والوں کو جگا سکتا نہیں غل دور کا
پوچھ لینا سب وطن کا حال اے اہل عدم
بیٹھ لینے دو ذرا آتا ہوں اٹھا دور کا
عجز کرتے ہیں عدوئے جان سے بھی خاصان حق
جھک گیا سر آگے پائے دار پر منصور کا
موت کیا آئی تپ فرقت سے صحت ہو گئی
دم نکلنے سے بدن ٹھنڈا ہوا رنجور کا
جاتے ہیں مے خانۂ عالم سے ہم سوئے عدم
کہہ دو ازخود رفتگی سے ہے ارادہ دور کا
موذیوں کو حادثوں سے دہر کے کیا خوف ہے
بارش باراں سے گھر گرتا نہیں زنبور کا
چشم ساغر بے سبب ہر دم لہو روتی نہیں
مغبچوں سے ساقیا دل پھٹ گیا انگور کا
جاتے ہیں مے خانۂ عالم سے ہم سوئے عدم
کہہ دو ازخود رفتگی سے ہے ارادہ دور کا
کی نظر جس پر کدورت سے رہا خاموش وہ
ہے اثر گرد نگاہ یار میں سیندور کا
جلوۂ معشوق ہر جا ہے بصیرت ہو اگر
کرمک شب تاب میں عالم ہے شمع طور کا
مر کے یاران عدم کے پاس پہنچوں گا امیرؔ
چلتے چلتے جان جائے گی سفر ہے دور کا
Jab se bāñdhā hai tasavvur us rukh-e-pur-nūr kā
Jab se bāñdhā hai tasavvur us rukh-e-pur-nūr kā
Sāre ghar mein nūr phailā hai chirāgh-e-tūr kā
Bakht vāzhoñ se jale kyuuñ dil na mujh mehrūr kā
Marham kāfūr se muñh aa gayā nāsūr kā
Is qadar mushtāq huuñ zāhid khudā ke nūr kā
But bhī banvāyā kabhī maiñ ne to sañg-e-tūr kā
Tujh ko lā'e ghar mein jannat ko jalāyā rashk se
Ham baghal tujh se hu'e pahlu dabāyā hūr kā
Gor-e-kāfir kis li'e hai tīra-o-tār is qadar
Paṛ gayā sāya magar merī shab-e-dījor kā
Husn-e-Yūsuf aur tere husn mein itnā hai farq
Choṭ ye nazdīk kī hai vār thā vo dūr kā
Qasr-e-tan bigṛā kisī kā gor-kan kī ban paṛī
Ghar kisī kā gir paṛā ghar ban gayā mazdūr kā
Chehra-e-jānāñ se sharmā kar chhupāyā khuld mein
Khāma-e-taqdīr ne khīñchā jo naqsha hūr kā
Hājat-e-mashshāṭa kyā rukhsār-e-raushan ke li'e
Dekh lo gul kāṭtā hai kaun sham'-e-tūr kā
Zulf-o-rū-e-yār se nairang-e-qudrat hai 'ayāñ
Mehr ke pañje mein hai dāman-e-shab-e-dījor kā
Khāksārī kar jo ho manzūr āñkhoñ mein jaga
Khāk ho kar surma ban jātā hai patthar-e-tūr kā
Ghāfiloñ ke kān kab khulte haiñ sun kar shor-e-hashr
Sone vāloñ ko jagā saktā nahīñ ghul dūr kā
Pūchh lenā sab vatan kā hāl ai ahl-e-'adam
Baiṭh lene do zarā ātā huuñ uṭhā dūr kā
Ajz karte haiñ 'adū-e-jāñ se bhī khāsān-e-haq
Jhuk gayā sar aage pā-e-dār par Mansūr kā
Maut kyā ā'ī tap-e-furqat se sehat ho ga'ī
Dam nikalne se badan ṭhanḍā huā ranjūr kā
Jāte haiñ mai-khāna-e-'ālam se ham sū-e-'adam
Kah do az-khud-raftagī se hai irāda dūr kā
Mūziyoñ ko hādisoñ se dahr ke kyā khauf hai
Bārish-e-bārāñ se ghar girtā nahīñ zanbūr kā
Chashm-e-sāghar be-sabab har dam lahū rotī nahīñ
Mugh-bachoñ se sāqiyā dil phaṭ gayā añgūr kā
Jāte haiñ mai-khāna-e-'ālam se ham sū-e-'adam
Kah do az-khud-raftagī se hai irāda dūr kā
Kī nazar jis par kudūrat se rahā khāmosh vo
Hai asar gard-e-nigāh-e-yār mein sindūr kā
Jalva-e-ma'shūq har jā hai basīrat ho agar
Kirmak-e-shab-tāb mein 'ālam hai sham'-e-tūr kā
Mar ke yārān-e-'adam ke pās pahuñchūñgā Amīrؔ
Chalte chalte jān jā'egī safar hai dūr kā
شاعر کے بارے میں
امیر مینائی اردو ادب کے ان درخشاں ناموں میں شمار ہوتے ہیں جنہوں نے شاعری، نعت گوئی اور لغت نویسی کے میدان میں گراں قدر خدمات انجام دیں۔ ان کا اصل ن...
مکمل تعارف پڑھیں