مرے بس میں یا تو یارب وہ ستم شعار ہوتا — امیر مینائی
شاعر
مرے بس میں یا تو یارب وہ ستم شعار ہوتا
مرے بس میں یا تو یارب وہ ستم شعار ہوتا
یہ نہ تھا تو کاش دل پر مجھے اختیار ہوتا
پس مرگ کاش یوں ہی مجھے وصل یار ہوتا
وہ سر مزار ہوتا میں تہہ مزار ہوتا
ترا مے کدہ سلامت ترے خم کی خیر ساقی
مرا نشہ کیوں اترتا مجھے کیوں خمار ہوتا
میں ہوں نامراد ایسا کہ بلک کے یاس روتی
کہیں پا کے آسرا کچھ جو امیدوار ہوتا
نہیں پوچھتا ہے مجھ کو کوئی پھول اس چمن میں
دل داغدار ہوتا تو گلے کا ہار ہوتا
وہ مزا دیا تڑپ نے کہ یہ آرزو ہے یارب
مرے دونوں پہلوؤں میں دل بے قرار ہوتا
دم نزع بھی جو وہ بت مجھے آ کے منہ دکھاتا
تو خدا کے منہ سے اتنا نہ میں شرمسار ہوتا
نہ ملک سوال کرتے نہ لحد فشار دیتی
سر راہ کوئے قاتل جو مرا مزار ہوتا
جو نگاہ کی تھی ظالم تو پھر آنکھ کیوں چرائی
وہی تیر کیوں نہ مارا جو جگر کے پار ہوتا
میں زباں سے تم کو سچا کہو لاکھ بار کہہ دوں
اسے کیا کروں کہ دل کو نہیں اعتبار ہوتا
مری خاک بھی لحد میں نہ رہی امیرؔ باقی
انہیں مرنے ہی کا اب تک نہیں اعتبار ہوتا
Mere bas mein ya to Ya Rab woh sitam-shi'aar hota
Mere bas mein ya to Ya Rab woh sitam-shi'aar hota
Yeh na tha to kaash dil par mujhe ikhtiyar hota
Pas-e-marg kaash yun hi mujhe vasl-e-yaar hota
Woh sar-e-mazaar hota main teh-e-mazaar hota
Tera mai-kada salamat tere khum ki khair saqi
Mera nasha kyun utarta mujhe kyun khumaar hota
Main hoon na-murad aisa ke bilak ke yaas roti
Kahin paa ke aasra kuch jo ummeedwaar hota
Nahin poochhta hai mujh ko koi phool is chaman mein
Dil-e-daghdar hota to gale ka haar hota
Woh maza diya tadap ne ke yeh aarzoo hai Ya Rab
Mere dono pehluon mein dil-e-beqarar hota
Dam-e-naza' bhi jo woh but mujhe aa ke munh dikhata
To Khuda ke munh se itna na main sharamsar hota
Na malak sawal karte na lahad fishar deti
Sar-e-rah-e-koo-e-qatil jo mera mazaar hota
Jo nigah ki thi zaalim to phir aankh kyun churayi
Wohi teer kyun na mara jo jigar ke paar hota
Main zaban se tum ko sachcha kahoon laakh baar keh doon
Use kya karoon ke dil ko nahin aitbaar hota
Meri khaak bhi lahad mein na rahi Ameer baqi
Unhein marne hi ka ab tak nahin aitbaar hota
شاعر کے بارے میں
امیر مینائی اردو ادب کے ان درخشاں ناموں میں شمار ہوتے ہیں جنہوں نے شاعری، نعت گوئی اور لغت نویسی کے میدان میں گراں قدر خدمات انجام دیں۔ ان کا اصل ن...
مکمل تعارف پڑھیں