تھا بہت بے درد لیکن حوصلہ دیتا رہا — عرش صدیقی
شاعر
تھا بہت بے درد لیکن حوصلہ دیتا رہا
تھا بہت بے درد لیکن حوصلہ دیتا رہا
وہ مجھے ہر شب نئے گھر کا پتہ دیتا رہا
میں اسے ڈھونڈا کیا جسموں کی جنت میں مگر
وہ مجھے خوابوں میں ملنے کی سزا دیتا رہا
کب اسے رکنے کی فرصت تھی غرور حسن میں
میں تعاقب میں رواں تھا میں صدا دیتا رہا
جل رہا تھا خود ہی بے مائیگی کی آگ میں
میں اسی دامن سے شعلوں کو ہوا دیتا رہا
گرچہ مہلک تھا مگر انصاف کی امید پر
مدتوں اک زخم قاتل کو صدا دیتا رہا
میں تو اس کی جستجو میں تھا گزر آیا مگر
دشت ماضی دیر تک بوئے وفا دیتا رہا
سب سے پیچھے رہ گیا ہوں عرشؔ یوں اس دشت میں
میں سفر میں ہر کسی کو راستہ دیتا رہا
Tha bahut be-dard lekin hausla deta raha
Tha bahut be-dard lekin hausla deta raha
Wo mujhe har shab naye ghar ka pata deta raha
Main use dhoonda kiya jismo'n ki jannat mein magar
Wo mujhe khwabo'n mein milne ki saza deta raha
Kab use rukne ki fursat thi ghuroor-e-husn mein
Main taaqub mein rawa'n tha main sada deta raha
Jal raha tha khud hi be-mayagi ki aag mein
Main isi daaman se sholo'n ko hawa deta raha
Garche mohlik tha magar insaaf ki umeed par
Mudato'n ek zakhm-e-qatil ko sada deta raha
Main to us ki justajoo mein tha guzar aaya magar
Dasht-e-maazi der tak boo-e-wafa deta raha
Sab se peeche reh gaya hoon Arshؔ yoo'n is dasht mein
Main safar mein har kisi ko raasta deta raha
شاعر کے بارے میں
عرش صدیقی (اصل نام: ارشادالرحمن) اردو کے ممتاز شاعر، افسانہ نگار، نقاد، محقق اور ماہرِ تعلیم تھے۔ وہ 21 جنوری 1927ء کو گُرداسپور، پنجاب میں پیدا ہو...
مکمل تعارف پڑھیں