وقت کا جھونکا جو سب پتے اڑا کر لے گیا — عرش صدیقی
شاعر
وقت کا جھونکا جو سب پتے اڑا کر لے گیا
وقت کا جھونکا جو سب پتے اڑا کر لے گیا
کیوں نہ مجھ کو بھی ترے در سے اٹھا کر لے گیا
رات اپنے چاہنے والوں پہ تھا وہ مہرباں
میں نہ جاتا تھا مگر وہ مجھ کو آ کر لے گیا
ایک سیل بے اماں جو عاصیوں کو تھا سزا
نیک لوگوں کے گھروں کو بھی بہا کر لے گیا
میں نے دروازہ نہ رکھا تھا کہ ڈرتا تھا مگر
گھر کا سرمایہ وہ دیواریں گرا کر لے گیا
وہ عیادت کو تو آیا تھا مگر جاتے ہوئے
اپنی تصویریں بھی کمرے سے اٹھا کر لے گیا
میں جسے برسوں کی چاہت سے نہ حاصل کر سکا
ایک ہم سایہ اسے کل ورغلا کر لے گیا
سج رہی تھی جنس جو بازار میں اک عمر سے
کل اسے اک شخص پردوں میں چھپا کر لے گیا
میں کھڑا فٹ پاتھ پر کرتا رہا رکشا تلاش
میرا دشمن اس کو موٹر میں بٹھا کر لے گیا
سو رہا ہوں میں لیے خالی لفافہ ہاتھ میں
اس میں جو مضموں تھا وہ قاصد چرا کر لے گیا
رقص کے وقفے میں جب کرنے کو تھا میں عرض شوق
کوئی اس کو میرے پہلو سے اٹھا کر لے گیا
اے عذاب دوستی مجھ کو بتا میرے سوا
کون تھا جو تجھ کو سینے سے لگا کر لے گیا
مہرباں کیسے کہوں میں عرشؔ اس بے درد کو
نور آنکھوں کا جو اک جلوہ دکھا کر لے گیا
Waqt ka jhonka jo sab patte uda kar le gaya
Waqt ka jhonka jo sab patte uda kar le gaya
Kyun na mujh ko bhi tere dar se utha kar le gaya
Raat apne chahne walon pe tha wo mehrban
Main na jata tha magar wo mujh ko aa kar le gaya
Ek sail-e-be-amaan jo aasio'n ko tha saza
Nek logon ke gharo'n ko bhi baha kar le gaya
Main ne darwaza na rakha tha ke darta tha magar
Ghar ka sarmaya wo deewarein gira kar le gaya
Wo iyadat ko to aaya tha magar jaate hue
Apni tasveerein bhi kamre se utha kar le gaya
Main jise barso'n ki chahat se na hasil kar saka
Ek humsaya use kal wargala kar le gaya
Saj rahi thi jins jo bazaar mein ek umr se
Kal use ek shakhs pardo'n mein chhupa kar le gaya
Main khada footpath par karta raha rickshaw talash
Mera dushman us ko motor mein bitha kar le gaya
So raha hoon main liye khali lifafa haath mein
Is mein jo mazmoon tha wo qasid chura kar le gaya
Raqs ke waqfe mein jab karne ko tha main arz-e-shauq
Koi us ko mere pehloo se utha kar le gaya
Ae azab-e-dosti mujh ko bata mere siwa
Kaun tha jo tujh ko seene se laga kar le gaya
Mehrban kaise kahoon main Arshؔ is be-dard ko
Noor aankhon ka jo ek jalwa dikha kar le gaya
شاعر کے بارے میں
عرش صدیقی (اصل نام: ارشادالرحمن) اردو کے ممتاز شاعر، افسانہ نگار، نقاد، محقق اور ماہرِ تعلیم تھے۔ وہ 21 جنوری 1927ء کو گُرداسپور، پنجاب میں پیدا ہو...
مکمل تعارف پڑھیں