کیا کہوں دل مائل زلف دوتا کیونکر ہوا — بہادرشاہ ظفر
شاعر
کیا کہوں دل مائل زلف دوتا کیونکر ہوا
کیا کہوں دل مائل زلف دوتا کیونکر ہوا
یہ بھلا چنگا گرفتار بلا کیونکر ہوا
جن کو محراب عبادت ہو خم ابروئے یار
ان کا کعبے میں کہو سجدہ ادا کیونکر ہوا
دیدۂ حیراں ہمارا تھا تمہارے زیر پا
ہم کو حیرت ہے کہ پیدا نقش پا کیونکر ہوا
نامہ بر خط دے کے اس نو خط کو تو نے کیا کہا
کیا خطا تجھ سے ہوئی اور وہ خفا کیونکر ہوا
خاکساری کیا عجب کھووے اگر دل کا غبار
خاک سے دیکھو کہ آئینہ صفا کیونکر ہوا
جن کو یکتائی کا دعویٰ تھا وہ مثل آئینہ
ان کو حیرت ہے کہ پیدا دوسرا کیونکر ہوا
تیرے دانتوں کے تصور سے نہ تھا گر آب دار
جو بہا آنسو وہ در بے بہا کیونکر ہوا
جو نہ ہونا تھا ہوا ہم پر تمہارے عشق میں
تم نے اتنا بھی نہ پوچھا کیا ہوا کیونکر ہوا
وہ تو ہے نا آشنا مشہور عالم میں ظفرؔ
پر خدا جانے وہ تجھ سے آشنا کیونکر ہوا
Kya kahoon dil mail-e-zulf-e-do-ta kyunkar hua
Kya kahoon dil mail-e-zulf-e-do-ta kyunkar hua
Ye bhala changa giraftar-e-bala kyunkar hua
Jin ko mehrab-e-ibadat ho kham-e-abroo-e-yar
Unka Kaabe mein kaho sajda ada kyunkar hua
Dida-e-hairan hamara tha tumhare zer-e-pa
Hum ko hairat hai ki paida naqsh-e-pa kyunkar hua
Nama-bar khat de ke us nau-khat ko tu ne kya kaha
Kya khata tujh se hui aur woh khafa kyunkar hua
Khaksari kya ajab kho-we agar dil ka ghubar
Khak se dekho ki aaina-e-safa kyunkar hua
Jin ko yaktai ka dawa tha woh misl-e-aaina
Unko hairat hai ki paida doosra kyunkar hua
Tere daanton ke tasawwur se na tha gar aab-dar
Jo baha aansoo woh dur-e-be-baha kyunkar hua
Jo na hona tha hua hum par tumhare ishq mein
Tum ne itna bhi na poochha kya hua kyunkar hua
Woh to hai na-ashna mashhoor-e-alam mein Zafar!
Par Khuda jaane woh tujh se ashna kyunkar hua
شاعر کے بارے میں
بہادر شاہ ظفر برصغیر کے آخری مغل فرمانروا اور اردو ادب کی ایک المناک مگر درخشاں شخصیت تھے۔ ان کا اصل نام ابو ظفر سراج الدین محمد تھا اور وہ 24 اکتو...
مکمل تعارف پڑھیں