نہیں عشق میں اس کا تو رنج ہمیں کہ قرار و شکیب ذرا نہ رہا — بہادرشاہ ظفر
شاعر
نہیں عشق میں اس کا تو رنج ہمیں کہ قرار و شکیب ذرا نہ رہا
نہیں عشق میں اس کا تو رنج ہمیں کہ قرار و شکیب ذرا نہ رہا
غم عشق تو اپنا رفیق رہا کوئی اور بلا سے رہا نہ رہا
دیا اپنی خودی کو جو ہم نے اٹھا وہ جو پردہ سا بیچ میں تھا نہ رہا
رہے پردے میں اب نہ وہ پردہ نشیں کوئی دوسرا اس کے سوا نہ رہا
نہ تھی حال کی جب ہمیں خبر رہے دیکھتے اوروں کے عیب و ہنر
پڑی اپنی برائیوں پر جو نظر تو نگاہ میں کوئی برا نہ رہا
ترے رخ کے خیال میں کون سے دن اٹھے مجھ پہ نہ فتنۂ روز جزا
تری زلف کے دھیان میں کون سی شب مرے سر پہ ہجوم بلا نہ رہا
ہمیں ساغر بادہ کے دینے میں اب کرے دیر جو ساقی تو ہائے غضب
کہ یہ عہد نشاط یہ دور طرب نہ رہے گا جہاں میں سدا نہ رہا
کئی روز میں آج وہ مہر لقا ہوا میرے جو سامنے جلوہ نما
مجھے صبر و قرار ذرا نہ رہا اسے پاس حجاب و حیا نہ رہا
ترے خنجر و تیغ کی آب رواں ہوئی جب کہ سبیل ستم زدگاں
گئے کتنے ہی قافلے خشک زباں کوئی تشنۂ آب بقا نہ رہا
مجھے صاف بتائے نگار اگر تو یہ پوچھوں میں رو رو کے خون جگر
ملے پاؤں سے کس کے ہیں دیدۂ تر کف پا پہ جو رنگ حنا نہ رہا
اسے چاہا تھا میں نے کہ روک رکھوں مری جان بھی جائے تو جانے نہ دوں
کئے لاکھ فریب کروڑ فسوں نہ رہا نہ رہا نہ رہا نہ رہا
لگے یوں تو ہزاروں ہی تیر ستم کہ تڑپتے رہے پڑے خاک پہ ہم
ولے ناز و کرشمہ کی تیغ دو دم لگی ایسی کہ تسمہ لگا نہ رہا
ظفرؔ آدمی اس کو نہ جانئے گا وہ ہو کیسا ہی صاحب فہم و ذکا
جسے عیش میں یاد خدا نہ رہی جسے طیش میں خوف خدا نہ رہا
Nahin ishq mein is ka to ranj hamen ke qarar o shakeb zara na raha
Nahin ishq mein is ka to ranj hamen ke qarar o shakeb zara na raha
Gham-e-ishq to apna rafeeq raha koi aur bala se raha na raha
Diya apni khudi ko jo ham ne uthaya woh jo parda sa beech mein tha na raha
Rahe parde mein ab na woh parda-nasheen koi doosra is ke siwa na raha
Na thi haal ki jab hamen khabar rahe dekhte auron ke aib o hunar
Padi apni buraiyon par jo nazar to nigah mein koi bura na raha
Tere rukh ke khayal mein kaun se din uthe mujh pe na fitna roz-e-jaza
Teri zulf ke dhyan mein kaun si shab mere sar pe hujoom-e-bala na raha
Hamen saghar-e-baada ke dene mein ab kare der jo saqi to haye ghazab
Ke yeh ahd-e-nishat yeh daur-e-tarab na rahega jahan mein sada na raha
Kai roz mein aaj woh mah-e-liqa hua mere jo samne jalwa-numa
Mujhe sabr o qarar zara na raha use pas-e-hijab o haya na raha
Tere khanjar o tegh ki aab rawan hui jab ke sabeel-e-sitam zadgan
Gaye kitne hi qaafle khushk-zaban koi tishna-e-aab-e-baqa na raha
Mujhe saaf bataye nigar agar to yeh poochhun main ro ro ke khoon-e-jigar
Mile paon se kis ke hain dida-e-tar kaf-e-pa pe jo rang-e-hina na raha
Use chaha tha main ne ke rok rakhun meri jaan bhi jaye to jaane na doon
Kiye lakh fareb karod fasoon na raha na raha na raha na raha
Lage yun to hazaron hi teer-e-sitam ke tadapte rahe pade khak pe hum
Wale naz o karishma ki tegh-e-do-dam lagi aisi ke tasma laga na raha
Zafar! Aadmi us ko na janiye ga woh ho kaisa hi sahib-e-fehm o zaka
Jise aish mein yaad-e-khuda na rahi jise taish mein khauf-e-khuda na raha
شاعر کے بارے میں
بہادر شاہ ظفر برصغیر کے آخری مغل فرمانروا اور اردو ادب کی ایک المناک مگر درخشاں شخصیت تھے۔ ان کا اصل نام ابو ظفر سراج الدین محمد تھا اور وہ 24 اکتو...
مکمل تعارف پڑھیں