سب لوگ جدھر وہ ہیں ادھر دیکھ رہے ہیں — داغ دہلوی
شاعر
سب لوگ جدھر وہ ہیں ادھر دیکھ رہے ہیں
سب لوگ جدھر وہ ہیں ادھر دیکھ رہے ہیں
ہم دیکھنے والوں کی نظر دیکھ رہے ہیں
تیور ترے اے رشک قمر دیکھ رہے ہیں
ہم شام سے آثار سحر دیکھ رہے ہیں
میرا دل گم گشتہ جو ڈھونڈا نہیں ملتا
وہ اپنا دہن اپنی کمر دیکھ رہے ہیں
کوئی تو نکل آئے گا سر باز محبت
دل دیکھ رہے ہیں وہ جگر دیکھ رہے ہیں
ہے مجمع اغیار کہ ہنگامۂ محشر
کیا سیر مرے دیدۂ تر دیکھ رہے ہیں
اب اے نگہ شوق نہ رہ جائے تمنا
اس وقت ادھر سے وہ ادھر دیکھ رہے ہیں
ہر چند کہ ہر روز کی رنجش ہے قیامت
ہم کوئی دن اس کو بھی مگر دیکھ رہے ہیں
آمد ہے کسی کی کہ گیا کوئی ادھر سے
کیوں سب طرف راہ گزر دیکھ رہے ہیں
تکرار تجلی نے ترے جلوے میں کیوں کی
حیرت زدہ سب اہل نظر دیکھ رہے ہیں
نیرنگ ہے ایک ایک ترا دید کے قابل
ہم اے فلک شعبدہ گر دیکھ رہے ہیں
کب تک ہے تمہارا سخن تلخ گوارا
اس زہر میں کتنا ہے اثر دیکھ رہے ہیں
کچھ دیکھ رہے ہیں دل بسمل کا تڑپنا
کچھ غور سے قاتل کا ہنر دیکھ رہے ہیں
اب تک تو جو قسمت نے دکھایا وہی دیکھا
آئندہ ہو کیا نفع و ضرر دیکھ رہے ہیں
پہلے تو سنا کرتے تھے عاشق کی مصیبت
اب آنکھ سے وہ آٹھ پہر دیکھ رہے ہیں
کیوں کفر ہے دیدار صنم حضرت واعظ
اللہ دکھاتا ہے بشر دیکھ رہے ہیں
خط غیر کا پڑھتے تھے جو ٹوکا تو وہ بولے
اخبار کا پرچہ ہے خبر دیکھ رہے ہیں
پڑھ پڑھ کے وہ دم کرتے ہیں کچھ ہاتھ پر اپنے
ہنس ہنس کے مرے زخم جگر دیکھ رہے ہیں
میں داغؔ ہوں مرتا ہوں ادھر دیکھیے مجھ کو
منہ پھیر کے یہ آپ کدھر دیکھ رہے ہیں
Sab log jidhar woh hain udhar dekh rahe hain
Sab log jidhar woh hain udhar dekh rahe hain
Hum dekhne walon ki nazar dekh rahe hain
Tewar tere ae rashk-e-qamar dekh rahe hain
Hum sham se asar-e-sehar dekh rahe hain
Mera dil gum-gashta jo dhunda nahin milta
Woh apna dahan apni kamar dekh rahe hain
Koi to nikal aayega sarbaaz-e-mohabbat
Dil dekh rahe hain woh jigar dekh rahe hain
Hai majma-e-aghyar ke hangama-e-mahshar
Kya sair mere dida-e-tar dekh rahe hain
Ab ae nigah-e-shauq na reh jaaye tamanna
Is waqt udhar se woh idhar dekh rahe hain
Har chand ke har roz ki ranjish hai qayamat
Hum koi din us ko bhi magar dekh rahe hain
Aamad hai kisi ki ke gaya koi udhar se
Kyon sab taraf raah-guzar dekh rahe hain
Takrar-e-tajalli ne tere jalwe mein kyon ki
Hairat-zada sab ahl-e-nazar dekh rahe hain
Nairang hai ek ek tera deed ke qabil
Hum ae falak shobada-gar dekh rahe hain
Kab tak hai tumhara sukhan talkh gawara
Is zeher mein kitna hai asar dekh rahe hain
Kuch dekh rahe hain dil-e-bismil ka tadapna
Kuch ghaur se qatil ka hunar dekh rahe hain
Ab tak to jo qismat ne dikhaya wahi dekha
Aainda ho kya nafa-o-zarar dekh rahe hain
Pehle to suna karte the ashiq ki museebat
Ab aankh se woh aath pehar dekh rahe hain
Kyon kufr hai didar-e-sanam Hazrat Waiz
Allah dikhata hai bashar dekh rahe hain
Khat ghair ka padhte the jo toka to woh bole
Akhbar ka parcha hai khabar dekh rahe hain
Padh padh ke woh dam karte hain kuch hath par apne
Hans hans ke mere zakhm-e-jigar dekh rahe hain
Main Dagh hun marta hun idhar dekhiye mujh ko
Munh pher ke yeh aap kidhar dekh rahe hain
شاعر کے بارے میں
جس کی غزلوں نے اردو زبان کو محبت کی مٹھاس، لہجے کی نزاکت اور بیان کی شوخی بخشی نواب مرزا خان داغ دہلوی۔ 25مئی 1831 کو دہلی میں پیدا ہونے والے داغ...
مکمل تعارف پڑھیں