زاہد نہ کہہ بری کہ یہ مستانے آدمی ہیں — داغ دہلوی
شاعر
زاہد نہ کہہ بری کہ یہ مستانے آدمی ہیں
زاہد نہ کہہ بری کہ یہ مستانے آدمی ہیں
تجھ کو لپٹ پڑیں گے دیوانے آدمی ہیں
غیروں کی دوستی پر کیوں اعتبار کیجے
یہ دشمنی کریں گے بیگانے آدمی ہیں
جو آدمی پہ گزری وہ اک سوا تمہارے
کیا جی لگا کے سنتے افسانے آدمی ہیں
کیا جرأتیں جو ہم کو درباں تمہارا ٹوکے
کہہ دو کہ یہ تو جانے پہچانے آدمی ہیں
مے بوند بھر پلا کر کیا ہنس رہا ہے ساقی
بھر بھر کے پیتے آخر پیمانے آدمی ہیں
تم نے ہمارے دل میں گھر کر لیا تو کیا ہے
آباد کرتے آخر ویرانے آدمی ہیں
ناصح سے کوئی کہہ دے کیجے کلام ایسا
حضرت کو تا کہ کوئی یہ جانے آدمی ہیں
جب داور قیامت پوچھے گا تم پہ رکھ کر
کہہ دیں گے صاف ہم تو بیگانے آدمی ہیں
میں وہ بشر کہ مجھ سے ہر آدمی کو نفرت
تم شمع وہ کہ تم پر پروانے آدمی ہیں
محفل بھری ہوئی ہے سودائیوں سے اس کی
اس غیرت پری پر دیوانے آدمی ہیں
شاباش داغؔ تجھ کو کیا تیغ عشق کھائی
جی کرتے ہیں وہی جو مردانے آدمی ہیں
Zahid na keh buri ke yeh mastane aadmi hain
Zahid na keh buri ke yeh mastane aadmi hain
Tujh ko lipat padenge deewane aadmi hain
Ghairon ki dosti par kyon aitbaar keeje
Yeh dushmani karenge begane aadmi hain
Jo aadmi pe guzri woh ek siwa tumhare
Kya ji laga ke sunte afsane aadmi hain
Kya juratein jo hum ko darbaan tumhara toke
Keh do ke yeh to jaane pehchane aadmi hain
Mai boond bhar pila kar kya hans raha hai saqi
Bhar bhar ke peete akhir paimane aadmi hain
Tum ne hamare dil mein ghar kar liya to kya hai
Aabaad karte akhir veerane aadmi hain
Nasih se koi keh de keeje kalam aisa
Hazrat ko ta ke koi yeh jaane aadmi hain
Jab daavar-e-qayamat poochhega tum pe rakh kar
Keh denge saaf hum to begane aadmi hain
Main woh bashar ke mujh se har aadmi ko nafrat
Tum shama woh ke tum par parwane aadmi hain
Mehfil bhari hui hai saudaiyon se uski
Us ghairat-e-pari par deewane aadmi hain
Shabash Dagh tujh ko kya tegh-e-ishq khai
Ji karte hain wahi jo mardane aadmi hain
شاعر کے بارے میں
جس کی غزلوں نے اردو زبان کو محبت کی مٹھاس، لہجے کی نزاکت اور بیان کی شوخی بخشی نواب مرزا خان داغ دہلوی۔ 25مئی 1831 کو دہلی میں پیدا ہونے والے داغ...
مکمل تعارف پڑھیں