ہم وصل میں ایسے کھوئے گئے فرقت کا زمانا بھول گئے — کامل شطاری
شاعر
ہم وصل میں ایسے کھوئے گئے فرقت کا زمانا بھول گئے
ہم وصل میں ایسے کھوئے گئے فرقت کا زمانا بھول گئے
ساحل کی خوشی میں موجوں کا طوفان اٹھانا بھول گئے
آنکھوں میں جو صورت تھی ان کی غیروں سے چھپانا بھول گئے
پھولوں کی محبت میں دامن کانٹوں سے بچانا بھول گئے
دل رکھ تو لیا وعدہ کر کے اور وعدے پہ آنا بھول گئے
یا یہ کہ محبت وہ نہ رہی یا ناز اٹھانا بھول گئے
بیتابیٔ دل کے ہاتھوں سے توہین محبت ہو نہ سکی
اچھا بھی ہوا جب وہ آئے ہم حال سنانا بھول گئے
جب چاہنے والے ختم ہوئے اس وقت انہیں احساس ہوا
اب یاد میں ان کی روتے ہیں ہنس ہنس کے رلانا بھول گئے
جینا ہے ترے ہی قدموں میں مرنا ہے ترے ہی قدموں میں
کیا خوب ہوا ہم در سے ترے سر اپنا اٹھانا بھول گئے
کیوں نیچی نگاہوں سے مجھ کو پیمانہ دکھا کر ہنستے ہو
آنکھیں تو ملا کر بات کرو نظروں سے پلانا بھول گئے
یا تو نے نظر خیرہ کر دی اے برق تجلی یا ہم ہی
دیدار میں اپنی آنکھوں کا احسان اٹھانا بھول گئے
خود آپ نے اپنے کاملؔ کو دیوانہ بنا کر چھوڑا ہے
اب ہوش اڑے کیوں جاتے ہیں کیا ہوش اڑانا بھول گئے
کامل شطاری
Hum vasl mein aise khoye gaye furqat ka zamana bhool gaye
Hum vasl mein aise khoye gaye furqat ka zamana bhool gaye
Sahil ki khushi mein maujon ka toofan uthana bhool gaye
Aankhon mein jo surat thi un ki ghairon se chhupana bhool gaye
Phoolon ki mohabbat mein daaman kaanton se bachana bhool gaye
Dil rakh toh liya wada kar ke aur wade pe aana bhool gaye
Ya yeh ke mohabbat woh na rahi ya naaz uthana bhool gaye
Betaabi-e-dil ke haathon se tauheen-e-mohabbat ho na saki
Achha bhi hua jab woh aaye hum haal sunana bhool gaye
Jab chahne wale khatam hue us waqt unhein ehsaas hua
Ab yaad mein un ki rote hain hans hans ke rulana bhool gaye
Jeena hai tere hi qadmon mein marna hai tere hi qadmon mein
Kya khoob hua hum dar se tere sar apna uthana bhool gaye
Kyun neechi nigahon se mujh ko paimana dikha kar hanste ho
Aankhein toh mila kar baat karo nazron se pilana bhool gaye
Ya tu ne nazar khaira kar di aye barq-e-tajalli ya hum hi
Deedaar mein apni aankhon ka ehsaan uthana bhool gaye
Khud aap ne apne Kamil ko deewana bana kar chhoda hai
Ab hosh ude kyun jaate hain kya hosh udana bhool gaye
شاعر کے بارے میں
کامل شطاری اردو کے معروف صوفی شاعر، نعت گو اور غزل نگار تھے جن کا اصل نام شیخین احمد حسینی تھا۔ وہ 1905ء میں حیدرآباد دکن کے تاریخی علاقے دبیرپورہ ...
مکمل تعارف پڑھیں