جنوں میں جو کچھ میں کہہ رہا ہوں مقام حیرت کی گفتگو ہے — کامل شطاری
شاعر
جنوں میں جو کچھ میں کہہ رہا ہوں مقام حیرت کی گفتگو ہے
جنوں میں جو کچھ میں کہہ رہا ہوں مقام حیرت کی گفتگو ہے
خبر نہیں کس کو دیکھتا ہوں پتہ نہیں کون روبرو ہے
یہ خود بھی اک تفرقہ ہے کہنا جو تو ہے میں ہوں جو میں ہوں تو ہے
ترے سوا دوسرا نہیں ہے کہ تو ہی خود تیرے روبرو ہے
کھلی جو مجھ پر مری حقیقت تو سب اضافی تھی میری نسبت
جب ان نگاہوں سے دیکھتا ہوں کہاں کا میں صرف تو ہی تو ہے
چمن کی ساری بہار تجھ سے گلوں کا سارا نکھار تجھ سے
تری اداؤں کی فتنہ پرور کسی میں خو ہے کسی میں بو ہے
کسی نے دامن میں لے لیے ہیں ڈھلے ہوئے آنسوؤں کے موتی
جو میری آنکھوں سے گر چکے ہیں ابھی تک ان کی یہ آبرو ہے
زمانہ کروٹ بدل رہا ہے نئی نئی چال چل رہا ہے
سحر نہ ہو جائے زندگی کی اگر یہی شام آرزو ہے
وہ بخش دے مجھ کو یا نہ بخشے میں اس کا بندہ وہ میرا مولیٰ
میں اس مسرت سے مطمئن ہوں کہ اس سے اک روز دو بہ دو ہے
ہمارا جی بار بار تم پر درود پڑھنے کو چاہتا ہے
کہ رخ جو والشمس ہو بہو ہے تو زلف واللیل مو بہ مو ہے
تمہارے ہاتھوں پہ بک چکے ہیں تمہاری چوکھٹ پہ ٹک چکے ہیں
تمہاری نسبت سے ہے یہ صاحب ہماری جو کچھ بھی آبرو ہے
بتاؤں کیا ہے یہ کیا تماشا فراق کیسا وصال کس کا
جو ساتھ ہر دم ہے میرے کاملؔ اسی سے ملنے کی آرزو ہے
کامل شطاری
Junoon mein jo kuch main keh raha hoon maqam-e-hairat ki guftagu hai
Junoon mein jo kuch main keh raha hoon maqam-e-hairat ki guftagu hai
Khabar nahi kis ko dekhta hoon pata nahi kaun rubaru hai
Ye khud bhi ik tafriqa hai kehna jo tu hai main hoon jo main hoon tu hai
Tere siwa doosra nahi hai ke tu hi khud tere rubaru hai
Khuli jo mujh par meri haqeeqat toh sab izaafi thi meri nisbat
Jab in nigahon se dekhta hoon kahan ka main sirf tu hi tu hai
Chaman ki saari bahaar tujh se gulon ka saara nikhaar tujh se
Teri adaon ki fitna parwar kisi mein kho hai kisi mein boo hai
Kisi ne daaman mein le liye hain dhale hue aansuon ke moti
Jo meri aankhon se gir chuke hain abhi tak unki ye aabroo hai
Zamana karwat badal raha hai nayi nayi chaal chal raha hai
Sahar na ho jaye zindagi ki agar yehi shaam-e-aarzoo hai
Woh bakhsh de mujh ko ya na bakhshe main uska banda woh mera Maula
Main is musarrat se mutmain hoon ke us se ik roz do ba do hai
Hamara ji baar baar tum par durood padhne ko chahta hai
Ke rukh jo wash-shams ho ba hoo hai toh zulf wallail moo ba moo hai
Tumhare haathon pe bik chuke hain tumhari chaukhat pe tak chuke hain
Tumhari nisbat se hai ye sahib hamari jo kuch bhi aabroo hai
Bataun kya hai ye kya tamasha firaq kaisa visal kis ka
Jo saath har dam hai mere Kamil isi se milne ki aarzoo hai
شاعر کے بارے میں
کامل شطاری اردو کے معروف صوفی شاعر، نعت گو اور غزل نگار تھے جن کا اصل نام شیخین احمد حسینی تھا۔ وہ 1905ء میں حیدرآباد دکن کے تاریخی علاقے دبیرپورہ ...
مکمل تعارف پڑھیں