کیا ایک نظر کی زحمت بھی اے جانِ جہاں منظور نہیں — کامل شطاری
شاعر
کیا ایک نظر کی زحمت بھی اے جانِ جہاں منظور نہیں
کیا ایک نظر کی زحمت بھی اے جان جہاں منظور نہیں
میں چاہے کسی قابل نہ سہی تیرے تو کرم سے دور نہیں
ہر چند فقط مختار نہیں ہر چند فقط مجبور نہیں
اک آہ تو بھر لوں اپنی خوشی اتنا بھی مجھے مقدور نہیں
ہاں حق تو ادا کر لیتا ہوں اے دوست ترے ہر جلوے کا
لیکن میں دیکھوں تیرے سوا توہین نظر منظور نہیں
ہے جتنا تقرب ان سے جسے اتنا ہی کسا جاتا ہے اسے
آئین محبت سب سے نئے پھر کوئی نیا دستور نہیں
یہ داغ محبت ہے جب تک تاریک نہیں ماحول مرا
ہر شب ہے شب مہ میرے لئے کوئی بھی شب دیجور نہیں
احوال دروں کی انساں کے غماز نگاہیں ہوتی ہیں
آنکھوں میں نظر مستور سہی آنکھوں سے نظر مستور نہیں
وہ راہ نورد شوق ہوں میں مشتاق ہیں راہیں خود میری
جب ہاتھ میں دامن ہے ان کا پھر کوئی بھی منزل دور نہیں
دل جس کا نہ ہو اندھا اس کی آنکھیں ہوں اگر بے نور تو کیا
ہاں اس پہ مگر کچھ غور کرو دل ہی تو کہیں بے نور نہیں
جو چاہیں کہیں یہ دیوانے آئین وفا سے بیگانے
مشرک ہوں اگر قدموں پہ ترے سجدوں کے لئے مامور نہیں
جب میں ہی نہ ہوں ہوتا ہے کوئی پاتا ہے جہاں کھوتا ہے کوئی
کیا اس میں مقام حیرت ہے یا جلوہ نہیں یا طور نہیں
بے وجہ نہیں یہ اشک رواں ملتی ہیں محبت کی کڑیاں
تم پاس بھی ہو کر پاس نہیں ہم دور بھی رہ کر دور نہیں
ہر گھاؤ ہے کاملؔ مژدۂ نو ہر داغ حیات غم کی نوید
جینے کا مزہ کیا خاک ملے زخموں سے اگر دل چور نہیں
کامل شطاری
Kya ek nazar ki zehmat bhi aye jaan-e-jahaan manzoor nahin
Kya ek nazar ki zehmat bhi aye jaan-e-jahaan manzoor nahin
Main chahe kisi qabil na sahi tere toh karam se door nahin
Har chand faqat mukhtaar nahin har chand faqat majboor nahin
Ek aah toh bhar loon apni khushi itna bhi mujhe maqdoor nahin
Haan haq toh adaa kar leta hoon aye dost tere har jalwe ka
Lekin main dekhoon tere siwa tauheen-e-nazar manzoor nahin
Hai jitna taqarrub un se jise itna hi kasa jaata hai usay
Aain-e-mohabbat sab se naye phir koi naya dastoor nahin
Yeh daagh-e-mohabbat hai jab tak tareek nahin mahol mera
Har shab hai shab-e-mah mere liye koi bhi shab-e-dejoor nahin
Ahwaal-e-daroon ki insaan ke ghammaz nigahein hoti hain
Aankhon mein nazar mastoor sahi aankhon se nazar mastoor nahin
Woh raah-naward-e-shauq hoon main mushtaaq hain raahein khud meri
Jab haath mein daaman hai un ka phir koi bhi manzil door nahin
Dil jis ka na ho andha us ki aankhein hon agar be-noor toh kya
Haan us pe magar kuch gaur karo dil hi toh kahin be-noor nahin
Jo chahein kahein yeh deewane aain-e-wafa se begaane
Mushrik hoon agar qadmon pe tere sajdon ke liye ma'moor nahin
Jab main hi na hoon hota hai koi paata hai jahan khota hai koi
Kya is mein maqam-e-hairat hai ya jalwa nahin ya Toor nahin
Be-wajah nahin yeh ashk-e-rawaan milti hain mohabbat ki kadiyan
Tum paas bhi ho kar paas nahin hum door bhi reh kar door nahin
Har ghaao hai Kamil mujda-e-nau har daagh-e-hayat gham ki naveed
Jeene ka maza kya khaak mile zakhmon se agar dil choor nahin
شاعر کے بارے میں
کامل شطاری اردو کے معروف صوفی شاعر، نعت گو اور غزل نگار تھے جن کا اصل نام شیخین احمد حسینی تھا۔ وہ 1905ء میں حیدرآباد دکن کے تاریخی علاقے دبیرپورہ ...
مکمل تعارف پڑھیں