وہی کچھ حسن کے جلووں کا پورا لطف پاتے ہیں — کامل شطاری
شاعر
وہی کچھ حسن کے جلووں کا پورا لطف پاتے ہیں
وہی کچھ حسن کے جلووں کا پورا لطف پاتے ہیں
جو اپنے دل کو خود اک مستقل کعبہ بناتے ہیں
وہ آتے جاتے جب ساز نفس کو چھیڑ جاتے ہیں
مرے اجزائے ہستی سب انہیں کے گیت گاتے ہیں
محبت ہو اگر سچی تو ایسے دن بھی آتے ہیں
وہ اپنے ناز برداروں کے خود بھی ناز اٹھاتے ہیں
خبر اس وقت ہوتی ہے وہ جب ناوک لگاتے ہیں
نشانہ کوئی ہو جس کو اڑانا ہوا اڑاتے ہیں
محبت کے کھلاڑی ہار کر بھی جیت جاتے ہیں
وہ اتنا جان کر ہی جان کی بازی لگاتے ہیں
جو اس پر مر مٹے ان سے ہزاروں فیض پاتے ہیں
انہیں مردہ نہ سمجھو وہ تو مردوں کو جلاتے ہیں
نظر حد تعین سے جہاں آگے نہیں بڑھتی
وہاں کچھ حسن کے بے قید جلوے مسکراتے ہیں
ہمیں وہ بھول جائیں تو گلہ کیا بھول جانے کا
جب ان کی یاد میں اپنے کو ہم خود بھول جاتے ہیں
کفن میں منہ چھپانا حسن سے اک چھیڑ ہے گویا
جو ہم سے منہ چھپاتے تھے ہم ان سے منہ چھپاتے ہیں
تعجب کیا اگر بے نور ہوں آنکھیں ضعیفی میں
سحر جب ہونے آتی ہے ستارے جھلملاتے ہیں
یہ مجھ پر تہمت ہستی نہیں تو اور پھر کیا ہے
حقیقت سے جو کورے ہیں وہ بے پر کی اڑاتے ہیں
وجود غیر وہمی ہی سہی مشہود ہو کیوں کر
نظر کے زاویوں پر تک تو وہ پہرے بٹھاتے ہیں
شراب عبدیت ہر پینے والے کو نہیں پچتی
یہ وہ مے ہے کہ جس کو ظرف والے ہی پچاتے ہیں
اثر ہو یا نہ ہو نالوں کا لیکن یہ بھی کیا کم ہے
کسی عنواں وہ میرا درد دل کچھ سن تو پاتے ہیں
کبھی کچھ اس طرح آواز آ جاتی ہے کانوں میں
وہ جیسے پاس ہی مدھم سروں میں گنگناتے ہیں
سہارا مل گیا ہے جب سے ان کی دستگیری کا
قدم دانستہ لغزش سے بھی اکثر ڈگمگاتے ہیں
کہے دیتی ہیں نظریں حال دل آنکھوں ہی آنکھوں میں
چھپاؤں لاکھ لیکن دل کے گوشے کھل ہی جاتے ہیں
مرے بس کی نہیں ترک محبت کیا کروں ناصح
میں جتنا بھولنا چاہوں وہ اتنا یاد آتے ہیں
نمک پروردۂ حسن ملیح یار ہوں کاملؔ
اسی نسبت سے دل کے زخم سارے مسکراتے ہیں
کامل شطاری
Wohi kuch husn ke jalwon ka poora lutf paate hain
Wohi kuch husn ke jalwon ka poora lutf paate hain
Jo apne dil ko khud ik mustaqil Ka'aba banate hain
Woh aate jaate jab saaz-e-nafas ko chhed jaate hain
Mere ajza-e-hasti sab unhi ke geet gaate hain
Mohabbat ho agar sacchi toh aise din bhi aate hain
Woh apne naaz bardaron ke khud bhi naaz uthate hain
Khabar us waqt hoti hai woh jab naawak lagate hain
Nishana koi ho jis ko udana hua udaate hain
Mohabbat ke khiladi haar kar bhi jeet jaate hain
Woh itna jaan kar hi jaan ki baazi lagate hain
Jo us par mar mite un se hazaaron faiz paate hain
Unhein murda na samjho woh toh murdon ko jalate hain
Nazar hadd-e-ta'ayyun se jahan aage nahi badhti
Wahan kuch husn ke be-qaid jalwe muskuraate hain
Hamein woh bhool jaaein toh gila kya bhool jaane ka
Jab unki yaad mein apne ko hum khud bhool jaate hain
Kafan mein munh chhupana husn se ik chhed hai goya
Jo hum se munh chhupate the hum un se munh chhupate hain
Ta'ajjub kya agar be-noor hon aankhein za'eefi mein
Sahar jab hone aati hai sitaare jhilmilate hain
Ye mujh par tohmat-e-hasti nahi toh aur phir kya hai
Haqeeqat se jo kore hain woh be-par ki udaate hain
Wujood-e-ghair wahmi hi sahi mashhood ho kyun kar
Nazar ke zaawiyon par tak toh woh pehre bithaate hain
Sharab-e-abdiyat har peene wale ko nahi pachti
Ye woh mai hai ke jis ko zarf wale hi pachaate hain
Asar ho ya na ho naalon ka lekin ye bhi kya kam hai
Kisi unwaan woh mera dard-e-dil kuch sun toh paate hain
Kabhi kuch is tarah awaaz aa jaati hai kaanon mein
Woh jaise paas hi madham suron mein gungunate hain
Sahara mil gaya hai jab se unki dastgiri ka
Qadam daanista laghzish se bhi aksar dagmagate hain
Kahe deti hain nazrein haal-e-dil aankhon hi aankhon mein
Chhupaun lakh lekin dil ke goshe khul hi jaate hain
Mere bas ki nahi tark-e-mohabbat kya karoon naaseh
Main jitna bhoolna chahoon woh utna yaad aate hain
Namak parwarda-e-husn-e-maleeh-e-yaar hoon Kamil
Isi nisbat se dil ke zakhm saare muskuraate hain
شاعر کے بارے میں
کامل شطاری اردو کے معروف صوفی شاعر، نعت گو اور غزل نگار تھے جن کا اصل نام شیخین احمد حسینی تھا۔ وہ 1905ء میں حیدرآباد دکن کے تاریخی علاقے دبیرپورہ ...
مکمل تعارف پڑھیں