روایت نہ ٹوٹے — کشور ناہید
شاعر
روایت نہ ٹوٹے
ہم روایات کی کہنہ صدیوں کے پربت تلے
وہ گھنے سبز جنگل ہیں جو
بے پناہ شاخ در شاخ تابندگی
تازگی کے تموج سے سنولا کے
خود ہی جھلس جائیں
ایسے جلیں ایسے جلیں
کہ فقط دور تک کوئلہ کوئلہ ہی دکھائی دے
اور تازگی کی نمو
خاک سے بھی گواہی نہ دے
وہ مقدر کے اچھے
کہ جن کو جلاپے کی مدت گزرنے پہ
ان کوئلوں کی جگہ ہیرے موتی ملے
وہ مقدر کے اچھے
کہ جن کی دعائیں زمیں کی تہوں میں وہیں
تو کہیں سونا چاندی بنیں
وہ مقدر کے اچھے
کہ جن کے بدن کھولتے خوں کے چشمے تھے
اب بھی ہیں
پارے کی کانوں کی صورت کہیں
تو کہیں ایسے بھی سخت جانوں کے ہیں سلسلے جا بجا
جن سے فولاد کا نام پایندہ ہے
وہ جلن جو کبھی تازگی کے تموج سے پیدا ہوئی
ہے مقدر کی تحریر ایسی کہ جس کی جلن ابتدا
انتہا بھی جلن
جلتے رہنے کا یہ سانحہ بھی جلن
انجمن انجمن
چودھویں رات کے چاند نے بھی کہا
بھیگی برسات کے رعد نے بھی کہا
تم وہی ہو کہ جن کو چٹخنے کی مہلت بھی ملتی نہیں
اب روایت یہی ہے
نبھاؤ ہنسو
مسکراؤ جلو
ہر اک زرد چہرہ گلابی کرو
ہر اک آنکھ کو ارغوانی کرو
مگر یاد رکھو
روایت نہ ٹوٹے
تموج کی ہر تازگی لاکھ جھلسے
روایت نہ ٹوٹے
Riwayat na toote
Hum riwayaat ki kohna sadiyon ke parbat tale
Woh ghane sabz jangal hain jo
Be-panah shakh dar shakh tabindagi
Tazgi ke tamawwaj se sanola ke
Khud hi jhulas jayen
Aise jalain aise jalain
Ke faqat door tak koila koila hi dikhayi de
Aur tazgi ki namoo
Khaak se bhi gawahi na de
Woh muqaddar ke achhe
Ke jin ko jalape ki muddat guzarne pe
Un koilon ki jagah heere moti mile
Woh muqaddar ke achhe
Ke jin ki duayen zameen ki tahon mein wahin
To kahin sona chandi banain
Woh muqaddar ke achhe
Ke jin ke badan khaultay khoon ke chashme thhe
Ab bhi hain
Paare ki kanon ki soorat kahin
To kahin aise bhi sakht janon ke hain silsile ja ba ja
Jin se folaad ka naam paayanda hai
Woh jalan jo kabhi tazgi ke tamawwaj se paida hui
Hai muqaddar ki tehreer aisi ke jis ki jalan ibteda
Inteha bhi jalan
Jalte rehne ka yeh saneha bhi jalan
Anjum! Anjum!
Chaudhween raat ke chand ne bhi kaha
Bheegi barsaat ke raad ne bhi kaha
Tum wahi ho ke jin ko chatakhne ki muhlat bhi milti nahin
Ab riwayat yehi hai
Nibhao hanso
Muskurao jalo
Har ek zard chehra gulabi karo
Har ek aankh ko arghawani karo
Magar yaad rakho
Riwayat na toote
Tamawwaj ki har tazgi lakh jhulse
Riwayat na toote
شاعر کے بارے میں
کشور ناہید اردو ادب کی اُن توانا اور باوقار آوازوں میں شمار ہوتی ہیں جنہوں نے شاعری کو محض جمالیاتی اظہار نہیں بلکہ سماجی شعور، مزاحمت اور نسائی خو...
مکمل تعارف پڑھیں