فقیرانہ آئے صدا کر چلے — میر تقی میر
شاعر
فقیرانہ آئے صدا کر چلے
فقیرانہ آئے صدا کر چلے
کہ میاں خوش رہو ہم دعا کر چلے
جو تجھ بن نہ جینے کو کہتے تھے ہم
سو اس عہد کو اب وفا کر چلے
شفا اپنی تقدیر ہی میں نہ تھی
کہ مقدور تک تو دوا کر چلے
پڑے ایسے اسباب پایان کار
کہ ناچار یوں جی جلا کر چلے
وہ کیا چیز ہے آہ جس کے لیے
ہر اک چیز سے دل اٹھا کر چلے
کوئی ناامیدانہ کرتے نگاہ
سو تم ہم سے منہ بھی چھپا کر چلے
بہت آرزو تھی گلی کی تری
سو یاں سے لہو میں نہا کر چلے
دکھائی دیئے یوں کہ بے خود کیا
ہمیں آپ سے بھی جدا کر چلے
جبیں سجدہ کرتے ہی کرتے گئی
حق بندگی ہم ادا کر چلے
پرستش کی یاں تک کہ اے بت تجھے
نظر میں سبھوں کی خدا کر چلے
جھڑے پھول جس رنگ گلبن سے یوں
چمن میں جہاں کے ہم آ کر چلے
نہ دیکھا غم دوستاں شکر ہے
ہمیں داغ اپنا دکھا کر چلے
گئی عمر در بند فکر غزل
سو اس فن کو ایسا بڑا کر چلے
کہیں کیا جو پوچھے کوئی ہم سے میرؔ
جہاں میں تم آئے تھے کیا کر چلے
Faqīrāna ā'e sadā kar chale
Faqīrāna ā'e sadā kar chale
Kemiyāñ khush raho hum du'ā kar chale
Jo tujh bin na jīne ko kahte the hum
So us 'ahd ko ab vafā kar chale
Shifā apnī taqdīr hī meñ na thī
Ke maqdur tak to davā kar chale
Paṛe aise asbāb-e-pāyān-e-kār
Ke nāchār yūñ jī jalā kar chale
Woh kyā chīz hai āh jis ke liye
Har ek chīz se dil uṭhā kar chale
Koī nā-ummedāna karte nigāh
So tum hum se muñh bhī chhipā kar chale
Bahut ārzū thī galī kī terī
So yāñ se lahū meñ nahā kar chale
Dikhā'ī diye yūñ ke be-khud kiyā
Hameñ āp se bhī judā kar chale
Jabīñ sajda karte hī karte ga'ī
Haq-e-bandagī hum adā kar chale
Parastish kī yāñ tak ke ai but tujhe
Nazar meñ sabhoñ kī khudā kar chale
Jhaṛe phūl jis rang-e-gulban se yūñ
Chaman meñ jahāñ ke hum ā kar chale
Na dekhā gham-e-dostāñ shukr hai
Hameñ dāgh apnā dikhā kar chale
Ga'ī 'umar dar band-e-fikr-e-ghazal
So is fan ko aisā baṛā kar chale
Kahīñ kyā jo pūchhe koī hum se Mīr
Jahāñ meñ tum ā'e the kyā kar chale
شاعر کے بارے میں
اردو شاعری کے عظیم شاعر میر محمد تقی میرؔ 1723 میں آگرہ میں پیدا ہوئے اور والد میر متقی کی علمی و صوفیانہ تربیت میں پرورش پائی۔ بچپن ہی میں والد ک...
مکمل تعارف پڑھیں