ہمارے آگے ترا جب کسو نے نام لیا — میر تقی میر
شاعر
ہمارے آگے ترا جب کسو نے نام لیا
ہمارے آگے ترا جب کسو نے نام لیا
دل ستم زدہ کو ہم نے تھام تھام لیا
قسم جو کھائیے تو طالع زلیخا کی
عزیز مصر کا بھی صاحب اک غلام لیا
خراب رہتے تھے مسجد کے آگے مے خانے
نگاہ مست نے ساقی کی انتقام لیا
وہ کج روش نہ ملا راستے میں مجھ سے کبھی
نہ سیدھی طرح سے ان نے مرا سلام لیا
مزا دکھاویں گے بے رحمی کا تری صیاد
گر اضطراب اسیری نے زیر دام لیا
مرے سلیقے سے میری نبھی محبت میں
تمام عمر میں ناکامیوں سے کام لیا
اگرچہ گوشہ گزیں ہوں میں شاعروں میں میرؔ
پہ میرے شور نے روئے زمیں تمام لیا
Hamāre āge terā jab kisū ne nām liyā
Hamāre āge terā jab kisū ne nām liyā
Dil sitam-zada ko hum ne thām thām liyā
Qasam jo khāiye to tāle'-e-Zulaikhā kī
'Azīz-e-Misr kā bhī sāhib ek ghulām liyā
Kharāb rahte the masjid ke āge mai-khāne
Nigāh-e-mast ne sāqī kī intiqām liyā
Woh kaj-ravish na milā rāste meñ mujh se kabhī
Na sīdhī tarah se un ne mirā salām liyā
Mazā dikhāvīñge be-rahmī kā terī sayyād
Gar iztirāb-e-asīrī ne zer-e-dām liyā
Mere salīqe se merī nibhī muhabbat meñ
Tamām 'umar maiñ nākāmiyoñ se kām liyā
Agarchih gosha-gazīñ hūñ maiñ shā'iroñ meñ Mīr
Pah mere shor ne rū-e-zamīñ tamām liyā
شاعر کے بارے میں
اردو شاعری کے عظیم شاعر میر محمد تقی میرؔ 1723 میں آگرہ میں پیدا ہوئے اور والد میر متقی کی علمی و صوفیانہ تربیت میں پرورش پائی۔ بچپن ہی میں والد ک...
مکمل تعارف پڑھیں