جس سر کو غرور آج ہے یاں تاجوری کا — میر تقی میر
شاعر
جس سر کو غرور آج ہے یاں تاجوری کا
جس سر کو غرور آج ہے یاں تاجوری کا
کل اس پہ یہیں شور ہے پھر نوحہ گری کا
شرمندہ ترے رخ سے ہے رخسار پری کا
چلتا نہیں کچھ آگے ترے کبک دری کا
آفاق کی منزل سے گیا کون سلامت
اسباب لٹا راہ میں یاں ہر سفری کا
زنداں میں بھی شورش نہ گئی اپنے جنوں کی
اب سنگ مداوا ہے اس آشفتہ سری کا
ہر زخم جگر داور محشر سے ہمارا
انصاف طلب ہے تری بیداد گری کا
اپنی تو جہاں آنکھ لڑی پھر وہیں دیکھو
آئینے کو لپکا ہے پریشاں نظری کا
صد موسم گل ہم کو تہ بال ہی گزرے
مقدور نہ دیکھا کبھو بے بال و پری کا
اس رنگ سے جھمکے ہے پلک پر کہ کہے تو
ٹکڑا ہے مرا اشک عقیق جگری کا
کل سیر کیا ہم نے سمندر کو بھی جا کر
تھا دست نگر پنجۂ مژگاں کی تری کا
لے سانس بھی آہستہ کہ نازک ہے بہت کام
آفاق کی اس کارگہ شیشہ گری کا
ٹک میرؔ جگر سوختہ کی جلد خبر لے
کیا یار بھروسا ہے چراغ سحری کا
Jis sar ko ghuroor aaj hai yan tajwari ka
Jis sar ko ghuroor aaj hai yan tajwari ka
Kal us pe yahin shor hai phir noha-gari ka
Sharminda tere rukh se hai rukhsar-e-pari ka
Chalta nahin kuchh aage tere kabk-e-dari ka
Afaq ki manzil se gaya kaun salamat
Asbab luta rah mein yan har safari ka
Zindan mein bhi shorish na gayi apne junoon ki
Ab sang madawa hai us aashufta-sari ka
Har zakhm-e-jigar daavar-e-mahshar se hamara
Insaf talab hai teri bedad-gari ka
Apni to jahan aankh ladi phir wahin dekho
Aaine ko lapka hai pareshan-nazari ka
Sad mausam-e-gul ham ko tah-e-baal hi guzre
Maqdoor na dekha kabhu be-baal-o-pari ka
Is rang se jhumke hai palak par ke kahe to
Tukda hai mera ashk-e-aqeeq-e-jigari ka
Kal sair kiya ham ne samandar ko bhi ja kar
Tha dast-e-nagar panja-e-mizhgan ki tari ka
Le sans bhi aahista ke nazuk hai bahut kaam
Afaq ki is kargah-e-sheesha-gari ka
Tuk Meer jigar-sokhta ki jald khabar le
Kya yaar bharosa hai chiragh-e-sahari ka
شاعر کے بارے میں
اردو شاعری کے عظیم شاعر میر محمد تقی میرؔ 1723 میں آگرہ میں پیدا ہوئے اور والد میر متقی کی علمی و صوفیانہ تربیت میں پرورش پائی۔ بچپن ہی میں والد ک...
مکمل تعارف پڑھیں