جلا ہُوا ہے نہ جانے کہاں چراغ اُس کا — سعید شارق
شاعر
جلا ہُوا ہے نہ جانے کہاں چراغ اُس کا
جلا ہُوا ہے نہ جانے کہاں چراغ اُس کا
کہ مجھ ہَوا کو بھی ملتا نہیں سراغ اُس کا
پٹخ دیا سرِ فرشِ فراق تو یہ کُھلا
مرے وجود سے لبریز تھا ایاغ اُس کا
نکل تو جاؤں دبے پاؤں ذہن سے لیکن
مَیں کیا کروں کہ بہت تیز ہے دماغ اُس کا
یہ اور بات مجھے مور جیسا لگتا ہے
بھٹک رہا ہے مرے جنگلوں میں زاغ اُس کا
مری نظر سے لگا تھا جو اُس کے چہرے پر
کسی بھی طرح نہیں مٹ سکا وہ داغ اُس کا
وہ مجھ کو سوچنے لگتا ہے اور شدت سے
کچھ اس لیے بھی گراں ہے مجھے، فراغ اُس کا
بہت سے پُھول مرے جیسے ہو چکے ،شارق
اُجڑ رہا ہے بتدریج پائیں باغ اُس کا
Jala hua hai na jaane kahan charagh us ka
Jala hua hai na jaane kahan charagh us ka
Ke mujh hawa ko bhi milta nahin suraagh us ka
Patakh diya sar-e-farsh-e-firaq to yeh khula
Mere wajood se labrez tha ayaagh us ka
Nikal to jaaun dabbe paaon zehn se lekin
Main kya karoon ke bahut tez hai dimaagh us ka
Yeh aur baat mujhe mor jaisa lagta hai
Bhatak raha hai mere janglon mein zaagh us ka
Meri nazar se laga tha jo us ke chehre par
Kisi bhi tarah nahin mit saka woh daagh us ka
Woh mujh ko sochne lagta hai aur shiddat se
Kuchh is liye bhi giraan hai mujhe, faraagh us ka
Bahut se phool mere jaise ho chuke, Shariq
Ujad raha hai ba-tadreej paayin baagh us ka
شاعر کے بارے میں
نوجوان شاعر سعید شارق کا اصل نام محمد اجمل سعید ہے۔ وہ 03 جون 1993ء کو اسلام آباد میں پیدا ہوئے۔ انھوں نے بی ایس انجینئرنگ ٹیکنالوجی ( مکینیکل) می...
مکمل تعارف پڑھیں